Session muanawm leh hrisel Nei tura inbuatsaihna sawifiah
September 1, 2020 aṭanga Assembly Session neih turah session muanawm leh hrisel neih a nih theih nana an inbuatsaihnate Assembly secretary H Lalrinawmna chuan a sawifiah.
H Lalrinawma chuan Indian Constitution article 174-na chuan Assembly Session ṭhutkhawm ni hnuhnung ber leh thutkhawm neih leh ni hmasa ber inkarah thla 6 a tla tur a ni lo tia tarlan a nih thu sawiin, "Eight Mizoram Legislative Assembly ṭhutkhawm vawi 6-na pawh Danpuiin a phut angin hripui leng karah September 1, 2020 aṭanga September 3, 2020 thleng neih turin Governor chuan a ko a ni," a ti.
Hripui leng vangin tum danga tih ngailoh inbuatsaihna chipchiar taka duan a nih thu sawiin H Lalrinawma chuan, "Hri laka invenna tur ruahmanna kimchang taka siam a ni. MLA-te leh session chhunga Assembly building-a lut turte zawm tur standard operating procedure siam a ni.Building luh dawnah sanitizer-a kut silfai vek tur a ni," a ti a, building chhunga lut turte chu thermal scanner hmanga endik vek an nih tur thu a sawi.
Assembly Secretary chuan MLA-te leh midang tupawh Assembly compound chhung leh session hall chhungahte social distancing dan zawm tur leh face mask englai pawha vuah reng tura beisei leh hriattir an nih thu sawiin, "Social distancing dan zawm a nih theih nan Chief Minister leh Speaker-te duhdan leh thurawn angin session hall-ah dawhkan leh ṭhutna dah belhin member-te dawhkan inṭawm loa, a mala an ṭhut theihna turin siamrem a ni," a ti.
Deputy Medical Superintendent, Civil Hospital Aizawl chu nodal officer-ah ruat a nih thu sawiin Assembly Secretary chuan, "Ani hovin doctor leh medical staff dang engemawzat session chhunga duty turin ruat an ni. Hemi bakah hian Disaster Management & Rehabilitation Department Director chu Disaster Management Act, 2005 leh SOP hrang hrangte tha taka zawm a nih theih nana enpui turin ruat a ni," a ti bawk.
Assembly Session turah hian hian starred question 239 a lut a, unstarred question 58 a lut. Assembly Session kalphung pangngai angin starred question hi ni khatah 20 zel a lut ang. Zawhna lutkhawm aṭangin nitin zawhna 20-te hi ballot hmanga pawh ṭhin tur a ni. Member pakhat zawhna a tam berah ni khatah 5 aia tam lo a lut ang.
Hall-a luh phalsak loh turte :
99F aia sang khawsik nei, tunhnaia khuh, thaw hah leh awm na nei.
Tunhnaia quarantine mek nena contact nei.
Containment emaw lockdown area aṭanga kal.
Covid-19 positive chenpui emaw tunhnaia positive nena contact nei.
Covid-19 lanchhuah dan (symptoms) hrang hrang nei.
Session atana bill lut tawhte :
The Mizoram Salaries, Allowances and Pension of Members of the Legislative Assembly (Eight Amendment) Bill, 2020
The Mizoram Shops and Establishment Regulation of Employment and Conditions of Service (Amendment) Bill, 2020
The Mizoram (Containment and Prevention of the Spread of Covid-19) Bill, 2020
The Court Fees (Mizoram Amendment) Bill, 2020
The Mizoram Fiscal Responsibility and Budget Management (Amendment) Bill, 2020
The Mizoram Goods and Services Tax (Fourth Amendment) Bill, 2020
The Mizoram States Sports Council (Amendment) Bill, 2020
The Mizoram Goods and Services Tax (Amendment) Bill, 2020