Taiwan leh Mizoram thawhhona tur a awm dawn - Taiwan Ambassador

Taiwan (Republic of China) Ambassador Chung Kwang Tien leh a thawhpuite chuan Inrinni khan State Guest House ah thuthar thehdarhtute a kawm a; Mizoram leh Taiwan thawh dun theihna tur kawng hrang hrangte an sawi.

Chung Kwang Tien hi a Second Secretary Lukas, Hsin-CHiang Hsu leh James HC Chang, Director Science and Technology Division, Taipei Economic and Cultural Centre in India ten an ṭawiawm a; Mizorama an lo zin chhante an sawu bakah Mizoram leh Taiwan chu nakin zela thawk dun thei tur an nih thu a sawi lang.
Chung Kwang Tien chuan Mizoram Rajya Sabha MP Ronald Sapa Tlau sawmnaa lo zin an nih thu a sawi a; Mizoram MP hian New Delhi-ah a be pawp a, lo neih leh a kaihhnawih lama Mizoramin hmasawnna a neih theih dan tur zir chianga kawhhmuh tur mithiam (expert) tir turin a ngen tih a sawi. Mizoram chu Taiwan ram leilung nen pawh inang tak, tlang ram tam zawkna a nih avangin theihtawp chhuaha hmalakpui an tum tih a sawi. Hemi bawhzui nan hian March 16-ah agriculture lama mithiam pahnih Mizoramah a rawn tir dawn tih a sawi a; he thil hi Mizoram sorkara chief secretary bakah agriculture department hotute leh loneitu aiawhte nen an sawiho tawh.
Taiwan Ambassador-in thawhdunna tura a ngaih zing­ah ruahtui luangral nasa lutuk tihtlem te, tlang sang aṭanga ruam lama tui luang thla zel luan khawmna siam te, lei humhalh (soil conservation) lamah te, mau hmanga eizawnna chawikante a tel.
Mizoramah grape a ṭha duh tih a hriat thu leh mi tam zawkin grape hi ching se sum hnar ṭha tak a ni dawn tih a sawi a, thiam­na sang zawk hmanga grape sawngbawl theih a nih thute a sawi lang. Mau hmanga thil siam ṭhinte pawh an thiamna chu chher hriama, an thilsiam chhuahte a ṭhat zawk theih nan inzirbelh an duh chuan an rama Bamboo based industry tlawh an phalsak reng tih a sawi.
Mizo ṭhalaite chu an fingin thiamna lamah pawh an duai lo tih a sawi a, kum tin Indian ṭhalaite tan an ramah zirna sang zawk, master degree, Ph.d leh post doctoral thleng a zir theih thu a sawi. Heng mite tan hian scholarship an pek thu leh tunah hian Indian zirlai 200-te chuan scholarship hmuin Taipei-ah zirna sang an bei mek a, hei hi Mizo ṭhalaite pawh chhawr ve turin a duh tih a sawi bawk.
Chung Kwang Tien chuan, "Kan thawhdunna hi economic lamah chauh tawp lo se, a mi chengte inpawh tawnna te, thiamna lama thawhdunnate huam vek se ka duh a ni" a ti.
Inrinni zan khan Taiwan palaite pual hian MP Ronald Sapa Tlau chuan Chawngvawr Resort, Chawnpuiah-ah zanriah a buatsaih a, zaithiamte nen hun an hmang a; Chung Kwang Tien chuan Mizoram a lo kal chu nuam a tih thu leh inunauna ṭha zawk siam zui ngei a tum thu a sawi.