BCM pastor nupuite'n Hna an bànsan a ngai

Baptist Church of Mizoram (BCM) Assembly vawi 119-na, Lunglei Farm Veng biak-ina neih chuan an kohhran pastor nupui, sorkar hna la thawk mekte chu kumin aṭanga an hna chawlhsan turin thutlukna an siam. BCM Assembly hi nizan khan a ṭiak a ni.

BCM Assembly-ah hian Inrinni khan rorel chhunzawm a ni a; kum 2008-a Assembly-in a lo rèl tawh, kum 2015 aṭanga pastor nupui, sorkar hnathawkte an hna aṭanga báng tura tih chu kaltlangpui turin an rel a ni. An thurel dang zingah, birth control kalpui danah Pathian thuin a zirtir dan mila inzirtir tura ram pum huapa hmalak, tih a tel.

BCM kohhran tinah kum khata Pathianni tûk khat tal taksa, silh leh fen, ei leh bar lama thianghlimna leh zûk leh hmuam laka thianghlimna sermon thlak te, ram tana chaw nghei ṭawngṭai ram pum huapa neih te, Pathianni zing inkhawm vawi khat Naupangte Ni-a hmante an rel bawk.

BCM Assembly-ah hian nimin khan chawhma inkhawmah pastor thar panga nemngheh an ni.