Assam Rifles thil tih dan duh loin Zokhawthar mipui an pungkhawm

Zokhawthar kaltlanga Mizoram (India) leh Myanmar insumdawn tawnna chungchanga Assam Rifles (AR) sipaite thil tih dan duh loin Zokhawthar mipuite chu nimin khan an khuaah an pungkhawm a; AR sipaite'n mipui sumdawnna an tibuai nia sawiin, sumdawnnaah AR-te chu inrawlh lo tura an duh thu an tarlang.

Zokhawthar YMA hruaitute hnen aṭanga thu dawn danin, an khaw mipuite chuan Myanmar lam nena insumdawn tawnnaah AR sipaite chu inrawlh nasa lutukah leh mipui harsatna siamah an ngai a; chu chu duh loin, mipuite chuan AR camp bul aṭanga Ṭiau lui kama Land Customs Station bul thleng kawng an zawh a, AR sipaite thil tih dan an duh loh thu an tlangaupui a ni.

Mipuite chu 'Zokhawthar sumdawnna tute'n nge tibuai - Assam Rifles' tih te, 'Zokhawthar mipui rilṭáma min siamtute hi tute nge - Assam Rifles' tih te, 'India state rálmuang ber hel ram ang maia mipuite rilṭáma min siamtute tute nge - Assam Rifles' tih te, 'Assam Rifles-te hi sumdawnnaah - Inrawlh suh se' tihte leh thil dangte hmangin an aurual a ni.

Zokhawthar khawtlang hmalakna ṭawiawm tur leh AR-in motor an hrên mektea thil phurh hlânthlak tumin Champhai Transport Union member eng emaw zat leh, Zotlang, Ruantlang leh Melbûk aṭangin mi eng emaw zat an tel.

Zokhawthar aṭanga thu dawn danin, AR-te hian Zokhawthara dan loa bungraw lak luh nia hriat leh dan anga chhiah pe lo nia an hriatte chu an hréng ṭhin a; nikum (2019) December thla chawhnu lam aṭangin Myanmar aṭanga lak luh kuhva rote chu a phurtu lirtheite nen truck phur 20 chuang an hréng mek a ni.

Mipui pungkhawm avang hian mipui leh sipai inkarah buaina lian a chhuak lo a, mipui an pungkhawm tih hriat a nih veleh Champhai SP Rex Zarzoliana hoin police eng emaw zat leh sorkar mi pawimawh dangte Zokhawtharah an kal nghal a, palai hna an thawk. Nimin chawhnu lam khan sorkar official-te kaihhruaiin AR hotute leh Zokhawthar khawtlang hruaitute chu Police Station-ah an inbe nghal. Police hotute chuan, AR sipaite'n an hrèn mek bungruate motor aṭanga hlângthla tura thutlukna awm tawh chu buaina chinfelna atan hmanraw ṭha ber a nih loh avang leh, AR sipaite kut aṭanga lirthei leh bungruate chu dan anga laka chinfel thuai tum a nih thu an sawi a; khawtlang ruahmanna - bungraw hlànthlak chu sût turin an ngen.

Police hotute ngenna chu khawtlang hruaitute chuan zawm rih ṭha an ti a, motor aṭanga bungraw hlânthlak an tumna pawh sûtin, nimin chawhnu dar 3 vel khan an ṭîn darh a ni. Meeting-a puan a nih angin AR-te chuan bungrua an hrênte chu nimin khan Customs kutah an hlân nghal a; police-te'n an véng zui a ni. 

Zokhawthar YMA hruaitu pakhat chuan, Assam Rifles chêt danin mipui nunau a tithlabár ṭhin nia sawiin, "Bo­r­der trade centre kan nih angin Custom lam leh police-te an duty reng a, police-te leh Customs duty-te ring zo loin an duh ang angin AR-te hian thil an ti a; sumdawnna an khuah­khirh nasa a, pawisa chawi­tirte pawh an nei ṭhin. An chêt dan hi khawtlangin kan ngai­mawhna a rei tawh," a ti.

Zokhawthar YMA hruaitute chuan, Ṭiau lui chu Zokhawthar mipuiin ṭangkai taka an hman, an mamawh leh thil chi hrang hrang an lakna hmun a nih thu sawiin, "Ṭiau lui luh thlakna kawng hrang hrangte pawh AR-te hian India leh Myanmar inkara dan loa bungraw lak luhnaah ngaiin an tichhia a, mipui kan buai phah hle," a ti a; tuna AR awmna chu Zokhawthar khawtlang ram a ni a, AR sipaite chu mipui harsatna siam­tu zawk an nih ṭhin avang­in, an awmna aṭanga chhuahtir dan an zawng a, mahse, a harsa rih hle tih an sawi.

Zokhawthar YMA hruaitute sawi danin, Zokhawtharah hian AR sipai platoon khat vel an awm ṭhin a, mahse, tun hnaiah sipai an indah belh nual a, kar hmasa Inrinni pawh khan eng emaw zat an thlen belh a ni. Mizoramin international border a neihte hi Assam Rifles leh BSF-te'n an véng a; Assam Rifles-te hian Mizoram khawchhak lam, Myanmar nena inrina an véng a, BSF-te'n khawtlang lama Bangladesh nena inrina an véng thung.