Mizorama sample 38,530 endikah Mi 1,003 (2.60%)-in Covid-19 an vei

August 27, Ningani thleng khan Mizoram aṭangin Covid-19 vei leh vei loh hre turin swab sample 38,530 endik a ni tawh a, chu'ng aṭang chuan hripui vei mi 1,003 hmuh chhuah tawh niin, chu chu sample test tawh aṭangin 2.60% a ni.

Mizorama swab sample lâk endikna hmasa ber National Institute of Cholera and Enteric Diseases (NICED), Kolkata-ah mi panga sample endik hman a ni a, a hnuah Guwahati Medical College-ah sample 12 endik leh niin, Lengpui Airport khâr a nih hnuah Silchar Medical College-ah sample 41 endik leh a ni.

April 7, 2020 aṭangin Zoram Medical College (ZMC) laboratory-ah RT-PCR hmangin swab sample endik ṭan a ni a, endik ṭan aṭanga August 27 thleng khan sample 27,132 endik a ni tawh. Lunglei Civil Hospital (LCH) laboratory-ah Truenat-PCR hmangin sample 1,719 leh Rapid Antigen Test (RAT) hmangin sample 9,621 endik a ni tawh bawk.

Swab sample endik aṭanga Covid-19 vei hmuh chhuah tawh dan chu - Guwahati Medical College-ah pakhat, ZMC-ah 741, LCH laboratory-ah 72 leh RAT hmangin 189 a ni. Hetih lai hian, Mizoram luhka hrang hrangah August 27 tlai dar 5 thleng khan mi 1,59,084 enfiah (screen) a ni tawh bawk.