KHAWTHLIR

Thisen pe
Ṭhuampui bial KṬP-te chuan Inrinni khan Sy­nod Hospital tan thisen unit 40 an pe a, a petute mipa 35 leh hmeichhia panga an ni. Tlangnuam branch KṬP pawhin Inrinni vek khan Aizawl Civil Hospital-ah thisen unit 37 an pe a, a petute mipa 30 leh hmeichhia pasarih an ni.

Pandal khawih
Presbyterian Kohhran Hmeichhe Inkhawmpui Lian neihna, Mamit khelmuala pandal chu March 6 zan khan khawih a ni. Sound system an khawih bakah, pandal cheina pangpar leh tuikhuahte an tichhia a, photo gallery leh electric bulb man to chite an la a, khuang an thukru bawk. Nimin thleng kha chuan a khawihtute an la man loa thu dawn a ni.

Sipai lal leh CM
Mizoram venhimna chungchang ngaihvena rawn zin, 3 Corp, Dimapur-a Lt.Gen. Bipin Rawat chuan March 6 tlai khan chief minister Lal Thanhawla chu a chenna bangla-ah a kâwm a; 23 Sector Assam Rifles DIG Brig. TC Malhotra-in a ṭawiawm.

Din cham lawm
Pang Zirlai Pawl joint headquarters, Aizawl chuan Inrinni khan MZP conference hall-ah an din champha vawi 31-na an lawm a; an dincham pual hian TNT, Zuangtuiah ṭanpuina an hlani.

MTOA lawm
Mizoram Truck Owners' Association (MTOA) chuan, Transport minister John Rotluangliana'n Mizorama bungraw luh dan tur veia a taka ṭan a lakpui chu lawmawm an tih thu an chhuah. Hetihlai hian kawng laka buhfai bothlau a awm lohna atan leh indaih zawka phurh a nih theihna atan avdance unload, stock leh motor danga suan loh nise an tih thu an tarlang a, "Hei hi zawm ṭheuh turin a truck neitute leh khalhtute kan ngen a ni," an ti.

Lirthei kal hun
Mamita Mizoram Presbyterian Kohhran Hmeichhe Khawmpui Liana palai haw ni a nih vangin vawiina lirthei kal dan tur ruahmanna siam a ni. Aizawl/Rawpuichhip lam pan turte chu chawhma dar 11 hmain Tut lei kân hman vek tur a ni a; Aizawl/Rawpuichhip lam aṭanga Mamit lam pan tur lirtheite chu chawhma dar 11 rîk hmain Tut lei kân phal a ni lo ang.