Helhoin kah chhuah an nei dawn lo: HM Zira

Home minister R Lalzirliana chuan, helhoin silai an hmang a nih pawhin, Mizoram sorkar lakah kah chhuah an neih dawn loh thu a sawi a; tun hnaia HPC(D) helte leh police-te inkahna, Khawlianah police tirh belh an nih thu a sawi bawk.

Zawhna chhangin R Lalzirliana chuan, helhoin Mi­zo­ram an kâp fo a nih chuan sorkarin a dawh mai mai dawn loh thu a sawi a, "Sorkarin Mizoram ṭhen têt emaw, autonomous district council thar siam emaw a remti lo a, hei hi sorkar ding lai chauh ni lo, sorkar thar pawh ding se an remtih a rinawm loh a ni," a ti a; helho chuan Mizoram sah thlak tum emaw, autonomous district council phûtna atan emaw Mizoram sorkar an kâp a nih pawhin, engmah an kah chhuah loh tur thu a sawi a ni.

Home Minister chuan, HPC(D)-te chu Hmar mipuite an hmangaih tak tak a nih chuan silai nena ràlkhata inhrosa loin, nunphung pangngaia nung turin kîr se, sorkar pawhin an hamṭhatna tur a ngaihtuah theih thu leh hmar tlangdung hmasawnna atan thawhpui an inpeih reng thu a sawi a; rálkhata silai nena an inhrosak a, silai an hmeh puah zel chuan sorkarin a dawh mai mai dawn lo tih a sawi bawk.