Gilead Special School tur sain hnatlang

Central KṬP chuan Bawngkawn Brigade rama Gilead Special School thar tur chu Inrinni khan hnatlangin a saksak. Falkland Venga Gilead Special School awmna ram chu a neituin a hralh avangin CM Lal Than­hawla'n Brigade ramah sikul sakna tur hmun a pe a, sikul chawlh chhunga sak zawh a nih theih nan CKṬP ruahmannain Inrinni khan Aizawla pastor bial pariata KṬP member-te'n hnatlangin an sa ṭan a; mi 300 chuang an thawk chhuak a ni.

Spastic Society of Mizoram hruaitute chuan, an sikul awmna ram hralh a nih avanga awmna hmun an neih tawh loh laia Chief Minister-in ram a pe chu lawmawm an tih thu an sawi a; an awmna ram leitu Central KṬP-in an duh duh chen awm an phalsak te, hnatlanga sikul tur an sakpui leh, a sak nana Rs. 5,00,000 an pete chu lawmawm an tih thu an sawi bawk.