RTI Act zawhna chhanna siamṭha

March 2, 2015-a chhuak Vanglaini-a FCSCA-in RTI Act hmanga zawhna an chhan tarlan chu tih dik loh palh a awm avangin an siam ṭha a; buhfai hralhna man Rs. 15-ah tihsan a nih vanga Mizoram sorkarin thla khata sum a hum theih zat tur chu Rs. 5,96,25,500 a nih thu an tarlang

Supply department chuan, Mizoram sorkarin APL buhfai man a tihsan vanga sorkarin buhfai man a hum theih tur zat an tarlan hmasak, thla khata cheng nuai 59.62 tih chu chhût sual palh vang niin an tarlang a, "APL tana buhfai man tihsan a nih hian thla khatah rate hmasa aiin kg. khat zelah Rs. 5.50-in a pung ang. Thla khata Mizoram buhfai (APL) mamawh kg. 10,841,000 aṭanga chhûtin, rate hmasa aiin a pumpuiah Rs. 5,96,25,500-in a pung ang," an ti.

RTI chhanna dangah, economic cost-a buhfai man tarlanah, October 2013-a phai aṭanga buhfai an leina rate kg. khatah Rs. 29.18 tia ziah chu Rs. 29.81 tih zawk tur a nih thu an tarlang bawk.