Kolkata-a Mizo nula hnam dang kawpte lakah CMWA leh KMS-in hmalak tum

Calcutta Mizo Welfare Association (CMWA) leh Kolkata Mizo Students' (KMS)-te chuan resolution siamin, Kolkata khawpuia Mizo nula awm, hnam dang mipa kawpa Mizo hnam timualpho thei zawnga che ṭhinte chungchangah ṭha an tih anga hma an lak dawn thu an puang.

CMWA leh KMS hruaitute hian March 6, 2015 khan joint meeting an nei a, Mizo nula, Kolkata-a a mawi lo zawnga khawsa ṭhinte chungchanga an hmalak tum dan an puang a ni.

CMWA leh KMS resolu­tion chuan, Kolkata-ah Mizo nula hnam dang kawp an awm nual thu leh chu'ng mite chuan zah nachang an hre lo a, Mizo khawtlang hruaitute mitmei pawh veng loin an khawsa ṭhin niin a tarlang a, "Kolkata-a Mizote’n buaina kan tawh tam tak hi hnam dang kawp ṭhinte vanga thleng niin a lang. Hnam dang kawp leh nun uluk loh vangin kan hnampui, mi invawng tak tak leh khawtlang leh ram tana inhmang ṭhinte min hmuh dan thlengin a khawih pawi a, hnam mualphona tam tak a thlen thei a ni," an ti.

Pawl pahnihte chuan, "Ualau taka hnam dang kawpte lakah CMWA leh KMS chuan a thîkthu a tichhe dawn a, Mizo hnam humhalhna kawngah hma an la dun dawn a ni," an ti a; hnam dang kawp ṭhinte avangin Mizote’n harsatna tam tak an tawh phah thin niin an sawi.

CMWA leh KMS tarlan danin, KMS chuan March 6, 2015 khan an member-te zinga hnam dang ngaihzawng neite Mizoram House-ah ko khawmin, an titipui a; Mizo nula ṭhenkhat an kal laiin, an koh zingah kal lo an awm nual. A kal lote chu KMS chuan a rang lama koh leh an tum a ni.

KMS-in Mizo nula, Kol­kata-a hnam dang kawp an koh leh hunah kim taka kal turin CMWA leh KMS-te chuan an ngen a, "Ngai pawimawh loa kal lo luite chu a ṭul angin an chungchang ngaihtuah zui a ni ang a, Mizorama haw luihtir dan tur thlengin CMWA leh KMS-in a ngaihtuah ang," an ti.