ZPM President-in MNF a lawmpui

Zoram Peoples' Movement (ZPM) president Lalliansawta chuan, village council leh local council inthlanah seat la tam ber, rorel lai MNF chu lawmpuina a hlân.

ZPM President hian nimin khan thuchah tichhuakin, ZPM hminga VC leh LC-a tling zawng zawngte lawmpuina thinlung taka a hlan thu a sawi a, "In thawhrimna nasa tak avangin kan chhuang che u. Tling zo ta lote chungah pawh lawmthu kan sawi. Páwl tana in inpekna leh tlawmngaihna nasa takte a ropui kan ti a, tunah tling rih lo mah ula, lo hnual reng reng suh ang che u," a ti.

Lalliansawta chuan, ZPM chu páwl naupang tak a ni rih sawiin, an party candidate-te chu engkim huama an din chhuah avangin lawmthu a hrilh a, "Mi dang chuan khaw hmun nghet taka bengbelin, in chhâwng nen an inchhawp rup tawh a, keini chuan khaw hmun sâm faiin, in atan châk kan dap khawm mek chauh ang a ni," a ti a; an candidate vote-tu mipui chungah an lawm thu a sawi.

ZPM aṭanga LC leh VC thar ding turte chu ram leh khawtlang tana ṭhahnem ngai taka theihtawp chhuah tura ngenin ZPM President chuan, "ZPM thupui, 'Kalphung thar, mipui sorkar' dik tak kan ramah a pian ngei theih nan a taka lantirtu, kan innghahna pawimawh in ni tih hre reng turin kan beisei che u. Tu party mah hlamchhiah bik lo ang che u," a ti.

Lalliansawta chuan, ZPM chuan politics-a beidawng tawhte tan beiseina thar a siam nia a lan thu sawiin, "Huapzo sorkar, thlei bik leh party bil awm lohna sorkar kan siam ngei a ṭul tak zet," a ti a; khawtlang hruaitu thlan thar zawng zawngte chu pachhia leh hmeithai te, a mamawhtute hnen thleng ngei tura rorelna din ṭheuh turin a ngen bawk.