MPCC-in thlan tlinte duhsakna hlân

Mizoram Pradesh Cong­ress Committee (MPCC) chuan, village council leh local council member atana thlan tlinte an lawmpui thu sawiin, anmahni thlangtu mipui beiseina tihlawhtling tura an khua leh veng tan theihtawp chhuah turin duhsakna an hlân.

MPCC chuan thuchhuah siamin, VC leh LC inthlanah mi tam takin vote thlak mah se, hri léng kài hlauh vangin neutral tam takin vote an thlâk thei lo nia sawiin, pawi an tih thu an tarlang a, "Ramin hripui vanga harsatna a tawh lai leh electoral roll-a felhlel tam em em chungin inthlan buatsaih a ni. Hri léng vangin vote tla a chhe em em a, 60% aia tam vote tlakna a awm mang lo. Vote a tlak chhiat chuan rorel lai dinhmun a ṭha em em zel a ni," an ti.

Congress party tarlan danin, vantlangah Covid-19 a darh ṭan tirh lai a nih avang­in mi tam takin vote an thlak ṭha ngam dawn lo tih an rin avangin Congress party chuan inthlan hun sawn an rawt a, press

kaltlanga sorkar an ngen bakah, MPCC President-in ziakin State Election Commission-ah a thlen a ni. Quarantine centre leh ina inkhung mekte'n vote an thlak theih dan tur ruahman turin SEC an ngen bawk.

VC/LC thlan tâkah ṭum dang angin vote thlak a chak thei lo tih sawiin MPCC chuan, "Veng hrang hrangah mipui dâwl zo tur polling booth siam a ni lo, vote thlak tum tam takin rei tak páwnah an intlar a ngaih phah a, vote thlak loin tam tak an haw phah bawk. Tun hmain hetianga inthlanna buarchuar leh fel lo hi Mizoramah a la awm ngai lo," an ti.