CBI-in kuhva tawlhrûk an chhui mek; Kuhva dahna kudam 23 an hmu chhuak

Central Bureau of Inves­tigation (CBI) chuan ram dang aṭanga dan loa Mizorama kuhva tawlhrûk chungchang a chhui mek a; district hrang hrangah kuhva dahna kudam 23 an hmu chhuak tawh a, an endiknaa an thil hmuhte (complaince report) court-ah an thehlut tawh.

Thu dawn danin, Mizorama dan loa ram dang kuhva tawlh chungchang chhui turin Gauhati High Court chuan CBI a hriattir a, chumi ang chuan CBI chuan case no. RC0212024A0003 [RC 3(A)/2024-IMP] a ziah lut a ni.

CBI chuan ram dang kuhva Mizorama tawlhrûk chungchangah hian August 7, 2024 khan Aizawl District Court-a Chief Judicial Magistrate (CJM) hnenah first information report (FIR) a thehlut a; FIR-a hming putu chu CBI, ACB, Imphal-a DIG & Branch head Dr Gagnandeep Singla, IPS a ni.

Aizawl Chief Judicial Magistrate-in kuhva chhui/zawn phalna (search warrant) a pek hnuah CBI mi leh sate chuan chawlhkar liam ta tir lam khan district hrang hranga kudamte an endik a, kuhva rah, dan loa tawlh nia hriat eng emaw zat an hmu chhuak.

Kuhva rah dah khawlna kudam an hmuh chhuah dan chu - Champhai district-ah kudam 19, Aizawl district-ah pahnih leh Kolasib district-ah pahnih a ni a; a vaiin kudam 23 a ni.

CBI hian kuhva dah khawmna kudam an endikna leh kuhva an hmuh chhuah dante tarlanna compliance report chu kar hmasa tawp lam khan Aizawl Chief Judicial Magistrate hnenah an thehlut tawh bawk.

Tarlan tawh angin, CBI-in Chief Judicial Magistrate hnena FIR an thehluhah chuan, ram dang kuhva tawlhrûk chungchangah Gauhati High Court Aizawl Bench-in July 16, 2024-ah FIR a ziah luh (register) tawh thu te, sorkar hnathawk zingah criminal conspiracy-a inhnamhnawiha puh an awm thu te, dan loa kuhva tawlh a nih theih nan document chi hrang hrang lem eng emaw zat siam leh hman a nih thute tarlan a ni.

Ram dang kuhva dan loa Mizorama tawlhruk chung­changah hian Vanramchhuangi, Chaltlang chuan December 29, 2021 khan Champhai Police Station-ah first information report (FIR) a thehlut a; April 29, 2022 khan Gauhati High Court Aizawl Bench-ah public interest litigation (PIL) a thehlut leh bawk.

Kuhva tawlhrûk titawp tura sorkarin hma a lak ṭhat loh avang leh a chhui zui ṭhat loh avangin PIL thehluttu chuan CBI chhuitir turin High Court a ngen a; Gauhati High Court judge pahnih - Justice Michael Zothankhuma leh Justice Marli Vankung te chuan July 16, 2024 khan thutlukna (judgement order) siamin, CBI chu a ṭul anga thubuai ziak lut a, chhui turin a hriattir a ni.

July 16, 2024-a Gauhati HC order-ah chuan, Mizoram sorkar (Vigilance department)-in Delhi Special Police Establishment Act, 1946 Section 6 tlawhchhanin December 28, 2023-ah CBI hnena general consent a pek tawh angin, CBI Director chu Myanmar aṭanga Champhai district kaltlanga India rama kuhva tawlhrûk leh a kaihhnawih thil - e-way bill leh GST certificate lem bakah thil dangte chhui tura hriattir a nih thu tarlan a ni.

High Court chuan, Myanmar aṭanga ramri kâna dan loa kuhva tawlh rûk chu Mizoram police-in an chhui hleih theih loh avangin dik tak leh hleih nei loin CBI-in an chhui a ngai tih a tarlang. Mizoram Chief Secretary-in June 12, 2024 khan High Court hnenah kuhva rah tawlhruk chungchang CBI chhuitir a duh chu state sorkarin a dodal loh thu a thlen thu te, Mizoram Additional Advocate General pawhin state sorkar ding mekin kuhva rah tawlhrûk a ngaimawh a, CBI chhuitir a hnial loh thu Court a hrilh thute a tarlang bawk.