Doctor zirlai thihna demin doctor-te'n lungawi lohna an lantir

RG Kar Medical College & Hospital, Kolkata-a doctor (post graduate) zirlai nula pakhat tualthihna an demzia leh thil thleng an duh lohzia lantir nan Mizorama doctor-te chuan August 17, Inrinni aṭanga nimin zing thleng khan lungawi lohna an lantir a, damdawi-ina inentirna hmunte khâr a ni a, harsatna lian tham thleng erawh hriat a ni lo.

Lungawi lohna hi India Medical Association (IMA) huaihawt niin, India ram puma doctor-te'n an zawm a, Mizorama doctor-te pawhin an lo zawm ve a ni. IMA-ah hian sorkar doctor-te chauh ni loin, kohhran damdawi-in leh mimal damdawi-ina thawkte pawh an tel vek a ni.

Lungawi lohna lantir hun chhung chu August 17 zing dar 6 aṭanga August 18 zing dar 6 thleng a ni a; hemi chhung hian damdawi-in OPD zawng zawng khâr a ni a, emergency/casualty erawh dan pangngaiin a kal thung.

Mizorama damdawi-in ṭhenkhatah chuan RG Kar Medical College & Hospital-a post graduate zirlai hmeichhia; August 9, 2024-a thah tâk sûnna hun hman a ni a; sûnna atan bati an chhit bakah, tualthattute man chhuaha hrem ngei an phûtna thuziakte an keng a ni.