NGOCC-in Gorkha OBC pek leh Airport-a an duh dan leh hmalakna MJA an sawipui

NGO Coordination Committee (NGOCC) hruaitute chuan, Gorkha-te'n OBC an hmuh avangin Mizoram sorkarah quota (reservation) nei ve nghal dawn lo mah se, nakin zelah Mizoram sorkarah reservation an dil leh ang a, sorkarin a pek an hlauh avangin Gorkha-te dilna chu an dodal thu an sawi.

NGOCC hruaitute hian August 17, Inrinni chhun khan Central YMA Committee Room-ah MJA Gen.Hqrs hruaitute an kâwm a; Gorkha-te'n Other Backward Class (OBC) nih an dilna an dodal chungchang leh Indian Air Force (IAF) hnena Lengpui Airport hlan an duh loh chungchang an sawipui a ni.

Inkawmhona hi NGOCC chairman Lalhmachhuana, CYMA president-in a kaihruai a; NGOCC secretary leh CYMA general secretary Prof. Malsawmliana'n Gorkha-te hnena OBC nihna pek an duh loh chhante leh IAF hnena Lengpui Airport hlan an duh loh chhante a sawifiah. NGOCC-a tel pawl aiawhte'n NGOCC dinna an sawi belh bakah, MJA hruaitute'n an ngaihdante an sawi ve bawk.

NGOCC hruaitute chuan, Gorkha-te'n OBC an hmuh avangin Mizoram sorkarah quota (reservation) nei ve nghal dawn lo mahse, OBC awmna state dang sorkarah reservation an neih deuh vek avangin Mizoram sorkarah reservation neih ve an dil leh ang a, state sorkarin a pek loh theih loh hun a la awm an rin thu leh an sawi.

Gorkha-te'n OBC an dilnaah, an duh chu sorkar laipuia OBC reservation awm chu neih ve an duh thu leh Mizoram state sorkarah quota an beisei tel dawn lo tih sawi nghal mah se, nakin zelah Mizoram sorkarah reservation an dil leh tho an rin thu an sawi bawk.

NGOCC hruaitute sawi danin, kum 2011 chhiar­pui ang chuan Mizoramah Gorkhali 9,035 an awm mek a; January 26, 1950 hma lama Mizorama awm tawhte thlahte bik chu mi 7,687 an ni a, Mizoram mipui zat aṭangin 0.6% vel an ni.

Lengpui Airport chungchangah NGOCC chuan, IAF-in an enkawl airport dangte an zir chian thu leh chu'ng airport-ahte chuan mipui tan harsatna leh thil buaithlak tam tak a awm thu te, IAF enkawl airport zingah changkang leh hmasawn tak a awm loh thute an sawi a; chu'ngte avang chuan Lengpui Airport chu IAF hnena hlan an duh loh thu an sawi.

NGO hruaitute chuan, mi dang hnena Lengpui Airport hlan/enkawltir chungchangah hian IAF hnena hlan chungchang chauh an ngaihtuah thu leh, Airport Authority of India emaw, private company emaw hnena hlan chungchang an ngaihtuah tel lo a, ngaihdan an la neih loh thu an sawi bawk.

Inkawmnaah hian NGOCC aṭangin CYMA office bearer te, MUP, MHIP, MZP leh MSU aiawhte an tel a; MJA aṭangin president C Lalrambuatsaiha hoin Executive Committee member-te an tel a ni.