NH-54 lungrem him lo vangin chhungkaw 3 an inthiar chhuak

NHIDCL leh an hnuaia contractor-te'n National Highway-54 an siamnaa Thingsul Tlangnuama retaining wall an siam chu a chêt leh a hlauhawm avangin a bul hnaia chhungkaw pathum chu nimin khan an inthiar chhuak.

Thingsul-Tlangnuama NH-54 kawngpui siamna lungrem a chêt avang hian a bul hnaia in ṭhenkhat chu a him loa ngaih a ni a; in pathuma chengte chu khawtlang mipui puihnain nimin khan an inthiar chhuak a ni. In pakhat chu khawtlangin hnatlangin an ṭhiat bawk.

Harsatna thlenna hmun hi bialtu MLA Prof. Lalnilawma, minister of state chuan nimin khan a tlawh nghal a; NH-54 enkawltu NHIDCL general manager Binod Srivastava leh kawng siamtu company hotute pawh koin, a rang thei ang bera lung rem ṭha tur leh, khawtlang mipui harsatna sutkiansak vat turin a hrilh a ni.