2024-ah ASF vangin vawk 28,291 thi tawh

Vawk pùl hri, African Swine Fever (ASF) vangin nimin khan vawk 60 a thi a, vawk 58 suat a ni. Kumin 2024-ah nimin thleng khan ASF vangin vawk 10,041 a thi tawh a, vawk 18,250 suat a ni tawh a; vawk thi leh suat belhkhawm chu 28,291 a tling.

AH&Vety department-in nimin thlenga report a dawn chinah, kumin hian khua/veng 209-ah ASF a lêng tawh a, infected area khua/vengahte chuan hri vanga vawk thi leh suat 28,291 a awm tawh a ni. Nimin Pathianni bikah district palia khua/veng 14-ah ASF vangin vawk 60 a thi a; vawk hri darh zel tur ven nan district pangaa khua/veng 13-ah vawk 58 suat a ni bawk.

Nimin khan Khawzawl district-a khua/veng pathumah vawk 40 thiin, ASF vanga vawk thi tamna ber district a ni a, khaw mala nimina vawk thi tamna ber Chalrang khuaah vawk 26 a thi. Serchhip district-a khua/veng parukah vawk suat 23 niin, nimina vawk suat tamna ber a ni a; New Serchhip South leh Hnahthialah vawk 10 ve ve suat a ni a, khaw mal anga nimina suat tam berna an ni.