Lunglei kawngpui kama lirthei dah/riah ṭhinte parkling fee khawn tawh dawn

Lunglei Municipal Council (LMC) chhunga lirthei dahna (garage) nei lote lirthei dah dan tur chungchangah August 16, 2024 khan LMC vice chairman K Lalrinawma hoin local council hruaitute an ṭhukhawm. Lunglei khawpuia garage nei lo, kawngpui kama lirthei riah ṭhinte hnenah September 2024 aṭangin lirthei dah man (parking fee) khawn a ni tawh dawn tih tarlan a ni.

K Lalrinawma chuan, LMC chhunga kawngpuite a thâwl zawk theih nan te, mipui an him zawk theih nan leh kawngpui kama lirthei dah vanga lirthei chetsualna a ziaawm theih nante LMC leh LC-te'n traffic management chungchangah thawh dunna thuthlung an ziah tawh thu a sawi.

LMC chief executive officer Donny Lalruatsanga chuan, LMC leh LC-te'n thawh dunna thuthlung an ziah tawh angin, garage nei lote hnenah September 2024 aṭangin parking fee khawn a nih tawh dawn thu a sawi bawk.

Meeting-a tarlan danin, Pûkpui aṭanga Zobawk inkar kawngpui (main road) bikah LMC-in private parking area a puan tawh bak zawng, commercial vehicle stand-te leh garage neih loh vanga kawngpui kama lirthei dah ṭhinte huamin parking fee khawn tawh tur a ni a; LMC-in lirthei hûn phal lohna hmun (no parking area)-a a puan tawh hmuna lirthei dahte pawh pawisa chawitir a ni tawh dawn.

Parking fee khawn leh pawisa chawitir chu LC-te'n an bawhzui dawn a, main road bakah, district road leh veng chhung internal road-te a huam vek dawn. LMC phalna tel loa zankhuaa lirthei riah ṭhin (overnight parking) lirthei lian chite chu pawisa chawitir an ni dawn bawk.

Ṭhutkhawmah hian ruahmanna felfai zawk a awm theih nana rawtna hrang hrang sawiho a ni a; LMC leh LC-te thawh dunna thuthlung awm sa anga September 2024 aṭanga parking fee khawn tur chu khauh taka kalpui a nih theih nan hmabak awmte chak zawka bawhzui ni se, an ti.