FCSCA Minister-in BSUP a tlawh; an kawtkaia ration an lak theih nan hmalak a tum

ZPM adviser B Lalchhanzova, FCSCA minister ni bawk chuan August 17, Inrinni khan Edenthar Venga Basic Service to Urban Poor (BSUP) Housing Complex a tlawh a; BSUP-a chengte'n hmun hla tak taka ration an la ṭhin pawh chu titawpin, an kawtkai ngeia ration an lak theih nan hma a lak dawn thu a sawi.

B Lalchhanzova chuan, ration card ṭhen hrang hrangah a awm tur dik takte an awm a ṭul thu a sawi a, "BSUP-a cheng zinga card var nei an lo la awm hi sorkar hmalakna tur a ni a, miretheite quota buhfai man loa semte mirethei awm khawmna BSUP-a awmte zingah chang ve lo an awm hi ram tan thil zahthlak tak a ni," a ti.

Ration card eng leh card pawla awm lo tur awm mek te, dinhmun ṭha zawka dingte card vara dah turin hmalak mek a nih thu te, AMC area-a card en ṭhat chu mipui hmuh theih turin veng tinah tar chhuah a nih dawn thu leh complaint duhte tan complaint theih hun hawn a nih dawn thute a sawi bawk.