Pawl hrang hrangin thisen an pe
August 17, Inrinni khan Mizoramah pawl hrang hrangin thisen unit 367 an pe. Mizoram Gorkha Youth Association (Central) chuan Gorkha School Complex, Khatlaah MGYA din champha pualin thisen pek rûnpui an huaihawt a, ZMC tan mi 87-in thisen an pe a, mipa 80 leh hmeichhia pasarih an ni.
YMA, Vanapa Group chuan Hnahlan community hall-ah thisen pek rûnpui huaihawtin, mipa 110 leh hmeichhia pathumin Champhai District Hospital tan thisen unit 113 an pe a; Tualcheng aṭangin mi 21, Hnahlan Hmarveng mi 21, Hnahlan Chhimveng 14, Vapar 13, Lungphunlian 12, Khuangphah 10, Murlen mi paruk, Vaikhawtlang leh North Diltlang mi panga ve ve, Selam mi pali leh Khawzawl mi pakhatte'n thisen an pe a ni.
ṬKP, Shalom unit, Mission Vengthlangin Civil Hospital, Aizawl tan unit 62 pein, petute mipa 39 leh hmeichhia 23 an ni a; KṬP, Leitan East Branch-in Synod Hospital tan unit 31 pein, petute mipa 24 leh hmeichhia pasarih an ni.
PYD, Lunglei Rahsi Veng Bialin Lunglei Civil Hospital tan unit 33 pein, petute mipa 29 leh hmeichhia pali an ni a; LIKBK Ṭhalai Pawl, Lawngtlai Vengpui Bial-in Lawngtlai District Hospital tan unit 25 pein, petute mipa 17 leh hmeichhia pariat an ni. ṬKP, Siaha East Bial member mipa 14 leh hmeichhia pahnihte'n Siaha District Hospital tan unit 16 an pe bawk.