KHAWTHLIR

Minister-in tlawh

Minister K Sapdanga chuan August 17, Inrinni khan Hnahthial khawpuia a department enkawl kaihhnawih hmun hrang hrang a tlawh. Minister hian Police leh Fire & Services department hmunhma te, leiminna hmun leh bawlhhlawh paihna hmunte a tlawh a; hmun a tlawhte tihchangtlun dan tur district hotute a sawipui. Minister hi Hnahthial bialtu MLA Jeje Lalpekhlua'n a ṭawiawm a ni.

Chawimawina hlân

YMA, Sialsuk South Branch chuan an member Lalrinmawia s/o Rotlinga, Sialsuk High School-a pawl 9 zirlai chu huaisen chawimawina August 16, 2024 zan khan an hlân. Lalrinmawia hian August 7, 2024 khan Sialsuk H/S-a pawl 10 zirlai pakhat, Sialsuk YMA Tuikhuaha tla a chhan chhuak a, chuvang chuan Sialsuk YMA-in huaisen chawimawina an hlan a ni.

Ruihhlo inzirtir

Foundation for Drug-Free, Mizoram chuan nimin khan Kulikawn Presbyterian Kohhran Youth for Christ, Baptist Church of Mizoram Bethlehem Vengthlang leh State Training Centre, Tanhrila Air Wing cadet-te pualin ruihhlo ṭhat lohzia inzirtirna an buatsaih. Moses Lalremruata, Prof. HK Laldinpuii Fente leh Johny Lalṭhafamkima ten ruihhlo ṭhat lohzia an zirtir a; tleirawl 400 vel ruihhlo laka fihlim turin an intiam a ni.

Darlak-Tuidam lirthei tlân dan tur

Mamit SP Lalthangpuii Pulamte chuan Darlak leh Tuidam inkar kawng hlui leh kawng thar (NH-44A/108) chu fûr lai a nih avangin a nâl thu a tarlang a; lirthei lian (MMV & HMV)-te chu zing dar 5 aṭanga chawhnu dar 2 inkarah chauh Tuidam aṭanga kal tur leh chawhnu dar 3 aṭanga zing dar 4 inkarah Darlak aṭanga kal turin a hriattir. Darlak leh Tuidam inkar kawng thar lamah LMV leh a aia tête chauh tlân tawh tur a nih thu a tarlang bawk.

Thing ṭiak phun

Mission Shakti hnuaia Lawngtlai District Hub for Empowerment of Women leh Women and Child Development District Programme Office chuan August 16, 2024 khan Beti Bachao Beti Padao (BBBP) 100 Days Campaign pualin Lawngtlai Observation Home-ah thing phun hnatlang an nei.