Inthlanah MNF-in lawmthu an sawi

MNF party chuan thuchhuah siamin, August 27, 2020-a VC leh LC inthlana vote thlaktute chunga an lawm thu leh, MADC-a Siaha North-I MDC by-election-a MNF candidate Nahlo Solo thlang tlingtute chunga an lawm thu an tarlang.

MNF chuan, khua leh veng hrang hranga MNF candidate thlang tlingtu mipui chungah lawmthu an sawi a, "Hripui léng vanga la inthlang ve thei lo khua leh vengte pawh tluang takin inthlanna nei thuai turin duhsakna kan hlan a ni," an ti. MNF-in hnehna sang tak an chang chu lawmawm an tih thu leh, mipuiin chief minister Zoramthanga leh a kaihhruai sorkar an rin tâwkzia an tihlannaa an ngaih thu an sawi.

Mara Autonomous District Council-ah hian Siaha North-I bialtu MDC a thih avangin August 26, 2020 khan by-election neih a ni a, MNF candidate Nahlo Solo chuan amah hnaih bertu B Zahra, BJP candidate chu vote sariha hnehin a tling a ni.