KHAWTHLIR

Women’s Day
Mizoram University-a Public Administration buatsaihin nimin khan MZU-ah International Women’s Day an hmang a, 'Women in governance and their participation in politics' tih thupui hmangin workshop buatsaih nghal a ni. International Women’s Day hmannaah hian MZU vice chancellor Prof. R Lalthantluanga khuallian a ni a, zirtirtu leh zirlai ṭhahnem tak an tel. International Women’s Day hi March 8 a ni a, Pathianni a nih avangin niminah an hmang a ni.

MST bus hun
Transport department chuan, mipui tana remchan zawkna vangin Aizawl-Silchar MST bus service chu chawhnu dar 1-a chhuak tawh loin, zing dar 6-ah a chhuak ṭhin dawn tih a tarlang. Hei hi vawiin aṭanga hman ṭan a ni ang.

Medal lawmpui
Mizoram State Sports Council (MSSC) chuan nimin khan an office-ah tun hnaia infiamna chi hrang hranga Mizoram tana medal dawngtute chawimawimna hun an buatsaih a, Mizoram Commission for Women chairperson Vanlalawmpuii Chawngthu, MLA-in a hmanpui.

MCCF din cham
Mizoram Cancer Care Foundation chuan vawiin chawhma dar 11-ah Zemabawka Mizoram State Cancer Institute-ah an din champha an lawm dawn a, an member-te a tam thei ang ber kal turin an insawm.

Ruihhlo man
Excise & Narcotics department chuan nimin khan Edenthar-ah Lalruatthanga (23), Phunchawng Veng nia insawi hnen aṭangin heroin grams 3.15 an man. Lalruatthanga hi thubuai siam sak a ni.

Hremna puang dawn
February 19 a Dampa Tiger Reserve-a Forest dept. hnathawk panga rubotute zinga mi, Court-in thiam loh a chan tir Lochiram Reang hremna tur chu nimin khan puan tur a ni a, mahse Lochiram hi Court-ah hruai a nih loh avangin vawiinah thutlukna hi puan a ni ang.