'Vahui' online grievance portal tlangzarh

Health & Family Welfare department hnuaia pisa hrang hrang leh damdawi-inte laka vuivaina leh lungawi lohna thlen duhte tana online hmanga thlen theihna tur, 'Vahui' online grievance portal chu nimin khan HFW minister Lalrinpuii'n a pisaah a tlangzarh.

Vahui online portal (www.vahui.in) hi web-based online portal niin, Mizoram Health Systems Strenthening Project bultuma siam a ni a; HFW department hnuaia pisate leh damdawi-inte laka vuivainate phone leh computer aṭangin thlen theih a nih bakah, chinfel a nih dante chhui zui theih a ni. Portal hian RTI Act leh a kaihhnawih te, thubuai kal lai leh thuràwn angte a huam lo thung.

Health Minister chuan, Vahui online portal chu HFW department tana hmasawnna chhinchhiah tlak leh chona thar petu tur a nih thu sawiin, "A hlawhtlinna atan mipui leh department thawktute ṭanrualna a pawimawh dawn a, theihtawp kan chhuah tlàn ṭheuh a ṭul," a ti a; portal thar chu mite ṭanpuitu ṭangkai tak a nih a beisei thu a sawi.

Mizoram sorkarin vuivaina leh lungawi lohna thlenna tur online portal 'Mipui Aw' nei tho mah se, HFW department hnuaia pisa te, district hrang hranga sub-centre hla ber aṭanga Secretariat thlenga harsatna thlenna tur leh harsatna chinfelna kawng fel tak mamawhna a awm avangin Vahui online portal siam a nih thu Lalrinpuii chuan a sawi bawk.

Health Minister chuan, Vahui online portal hlawhtlinna chu office leh damdawi-in zawng zawnga Grievance Redressal Committee-te kutah a innghah tlat thu a sawi a; mipui rawngbawlna, a bik takin 'Vahui' hlawhtlin theih nana theihtawp chhuah turin nodal officer-te leh committee-te a sáwm a ni.

VAHUI ONLINE PORTAL

* Health facility leh office zawng zawngah Grievance Redressal Committee din a ni a, nodal officer-te ruat a ni.

* www.vahui.in ah vuivainate thlen turin mimal information ziah luh hmasak a ngai a, ziak luttu phone number-ah SMS-in tracking ID pek a ni ang.

* Tracking ID hmang hian an thu thlen chu a thlen chin a chhui theih a, thuneitute'n an chinfel hnuah SMS-in chinfel a nih thu hriattirna a dawng ang.

* Vuivaina leh lungawi lohna lutte hi State Screening Center (National Ambulance Services, NHM) chuan lo thliarin, a thlenna tur office/ facility-ah portal kaltlang hian a thawn ang.

* Nodal officer-te'n SMS-a hriattirna dawngin, ṭul angte an bawhzui ang.

* Vuivaina leh lungawi lohna lutte chu ni 7 chhunga chinfel hman tur a ni a, chinfel a nih loh chuan thuneitu sang zawkah thlen a ni ang.

* Chinfel dan chu portal-ah en theih tura dah tur a ni a, portal-a inziak lut thei lo tan Grievance Redressal helpline number 104-ah biak theih a ni.

* Facility tinah help desk a awm zel dawn a, Grievance Box-a vuivaina lutte chu facility in-charge-te'n online portal-ah an ziak lut zel ṭhin ang.