News Lawrkhawm

Health secretary-in JN Hospital tlawh
Health department secretary Arun Goyal chuan March 7, 2015 khan JN Hospital, Serchhip a tlawh a, damdawi-in building, thawktute din­hmun leh inrêlbàwlna hrang hrangte a enfiah.
Arun Goyal hian damdawi-ina section hrang hrangte a fang a, damdawi-ina thawktute chu hmasawnna tur hrang hrangte kawhhmuhin, ruahmanna a siampui. Damdawi-in a fan zawhah CMO conference hall-ah Ser­chhip DC Juhi Mukherjee hoin damdawi-ina thawktute a kâwm leh a; thawktute chuan an mamawh zualte an hrilh a ni.

Bill pathum a lut tawh
March 17 a Assembly Budget Session neih tura ngaihtuah atan sorkar bill pathum, zawhna House-a chhan chi (starred question) leh ziaka chhan chi (un starred question) 16 a lut tawh.
Sorkar bill lutte chu - 'The Mizoram Municipalies (Second Amendment) Bill, 2015, 'The Mizoram Youths Commission Amendment Bill, 2015' leh 'The Mizoram Right to Public Services Bill, 2015' te an ni a, bill dang pahnih a la luh beisei a ni.
Assembly Session ṭanniah governor Dr. Aziz Qureshi chuan House-ah thu a sawi ang a, March 19 ah Finance minister Lalsawta'n vote on account leh kum 2014-15 a sorkar sum indaih lohna phurhrukna atana sum dil belhna 'Supplementary Demand for Grants a pharh ang.

Lawngtlaiah Orientation Training for Skill
World Vision India, Chhimtuipui ADP chuan nimin khan Lawngtlai Press Club-ah an area chhung­a thil chi hrang hrang training tura an thlante tan 'Orientation Training for Skill' an buatsaih.
World Vision India, Chhimtuipui ADP programme manager Paul TTouthang chuan training turte chu eizawnna mumal an neih theihna atan taima tak leh ṭha­hnem ngai taka zir tura chahin, "Training zawh hunah in eizawnna atana hmanraw pawimawh turte ngaihtuah sak in ni dawn a ni," a ti.
Training tura thlante chu puanṭhui zirtur mi 24, computer zirtur mi 12, motor khalh zirtur mi pahnih leh mechanic zirtur mi pahnihte an ni.

Dan loa bungraw lakluh tum an tam
Sumdawnna bungrua dan loa Mizorama lakluh tur kum 2010 aṭanga 2014 chhunga Vairengtea Taxation department check gate-a an man sakte pawisa chawi tlingkhawm chu cheng nuai 52 chuang a ni.
Thudawn danin, Vairengte Taxation department checkgate hi nitin motor lian 100 chuangin a paltlang ṭhin a, way-bill tel loin Mizoramah bungrua phurh luh tum engemzat an awm ṭhin. Phalna nei loa bungraw lakluh tum man chhuahte chu chhiah an chawi tur pangngai aia a let nga a tam an chawi tir ṭhin.
Dan loa Mizorama bungraw lakluh tum hi kum tin a pung a, nikum April-December thla chhung bika dan loa bungraw lakluh tum Taxation checkgate-a an mante pawisa chawi tlingkhawm chu cheng nuai 24 vel a ni.