KHAWTHLIR

Mizoram Police din champha lawmna puala thisen pek rûnpui kalpui mek zelah Serchhip District Executive Force (DEF)-te chuan nimin khan Serchhip District Hospital-ah thisen unit 17 an pe a, petute mipa 16 leh hmeichhia pakhat an ni. Saitual DEF pawhin nimin khan Aizawl Civil Hospital tan thisen unit 14 an pe bawk.

Mizoram Upa Pawl chuan thuchhuah siamin, Mizoram aṭanga chhuak Bru-te Tripura-a an awm hlenna tura sorkar laipui, Mizoram sorkar, Tripura sorkar leh Bru pawl hrang hrangte'n inremna an ziak ta chu lawmawm an tih thu an tarlang a, "Mizoram electoral roll aṭanga an hming paih hun nghakhlel takin kan lo thlir reng a ni," an ti.

Nimin khan Kolasib-a Land revenue & Settlement department pisaah surveyor-te tan training, chawlhkar khat awh tur buatsaih ṭan a ni a, district bawrhsap Sangchhin Chinzah-in a hawng. 

Land Revenue & Settlement department officer-te chu nimin khan an minister hoin an department directorate conference hall-ah an inhlanthar a, an hma­chhawp hrang hrangte an sawiho nghal. Lalruatkima chuan thawhhona ṭha

hnuaiah lo chuan hmasawnna a thlen theih loh thu a sawi.

Excise & Narcotics department leh Champhai Zotlang JAC-te chuan January 19, Pathianni chawhnu dar 2:30 khan Ruantlangah heroin kg. 1 leh gram 508 (hawng 120) an man. Heroin neitua puh Lalrinchhana (32) s/o Zothanmawia, Jacob Lalhriatpuia (28) s/o Vanlalsailova, Malsawmtluanga (28) s/o Rokhuma, Lalnunthanga (23) s/o Lalnunsiama, Champhai Zotlang nia inchhál te, Hmingthansanga (29) s/o Lalrin­liana, Chhiahtlang leh Lallianpari (44) d/o Laiirha, Dartetui nia inchhalte an man tel.

Mizoram Pollution Control Board hnuai­a Mizoram ENVIS Hub chuan nimin khan Administrative Trai­ning Institute (ATI)-ah Green Skill Development Programme kaltlang­in thla hnih awh tur 'Certificate Course on Waste Ma­nagement' an buatsaih ṭan a, MPCB member secretary C Lalduhawma'n a hawng.