KHAWTHLIR
Bazar-ah motor lian kal phal lo
Aizawl Traffic SP chuan thupek chhuahin, Aizawl New Market area chhungah lirthei lian (HMV) leh lirthei laihawl (MMV) rit phur kal phal a nih tawh loh thu a tarlang. Motor lian kal phal loh chhan hi New Market chhunga culvert-te a rinawm tawh loh vang a ni.
Hlawh vangin lawm
Mizoram Deficit Mission Schools Association leh Mizoram Government Adhoc Aided School Teachers Union-te chuan thuchhuah siamin, sum harsat laia Mizoram sorkarin February 2015 thleng hlawh ṭha taka a pek theih avangin lawmawm an tih thu an tarlang.
Airport thawktu lungawi lo
Airports Authority Employee's Union (AAEU) chuan vawiin hian sorkar laipuiin Chennai, Kolkata, Jaipur leh Ahmedabad Airport privatise a tum duhlohna lantirna atan lungawi lohna an lan tir dawn a, Lengpui Airport a hnathawkte pawhin an thlawp dawn.
Zirhona buatsaih
Mizoram University-a Psychology department leh Alumni Association of Psychology, MZU ṭangkawp chuan nimin khan MZU-ah ngawlveite enkawl dan zirhona an buatsaih a, minister Lalrinmawia Ralte-in a hawng.
Kawnpui lawm
Kawnpui Youth Association chuan thuchhuah siamin, Kawnpui leh a chhehvel mipuite mamawh hriaa sorkarin Kawnpui PHC-ah Dr Vanlalhruaia a dah thar chu lawmawm an tih thu an tarlang. Kawnpui damdawi-in quarters-te chu tihchangtlun ni thei se an duh thu an sawi.
Thiam loh chang
Kum 2012 a hmeichhe naupang kumtling lo pawngsualtu, Pau Zadinga chu nimin khan Additional District Session Court-in thiam loh a chantir. Pau Zadinga hi IPC 376 (2) hmanga thiam loh chantir niin, kum 10 aia tlem lo lungin tantir emaw, dan chhung tang tura hrem theih a ni.