Zangnadawmna dawn tur hnathawhna atan pe kir

Kawnpui leh Buichali inkar kawng siam mek atana ram lak neitu pahnih H Lalnghakliana, Kawnpui Chhim Veng leh Zoramthanga, Kawnpui Bangla Veng-te chuan zangnadawmna an dawn tur chu an dawng duh lo a, kawngpui ṭha siamna atan an pe kir.

Huan neitu pahnihte chuan kawng­pui siam mek chu ram leh mipuite tana hmasawnna thlentu tur a nih avangin sorkarna hmalakna lawm takin an dawngsawng tih an sawi.

H Lalnghakliana hi a huan metre 150-a thui kawngpui atana laihsak a ni a, zangnadawmna lak a tum loh thu a sawi chungin, hnathawktu ABCI chuan lawmthu sawina atan Rs. 50,000 an pe.

H Zoramthanga chuan lei laihna vung avangin thingfanghma, balhla leh thlai dangte a chân a, zangnadawmna pawisa dawng tura tih a ni. Mahse, zangnadawmna aiin kawngpui ṭha a pawimawh zawk tiin a pawisa dawn tur a hnawl.