UD&PA minister-in in sak ṭanpuina a sem

UD&PA minister Zo­dintluanga chuan nimin khan Zuangtuiah Rajiv Awas Yojana (RAY) pilot project aṭangin mirethei, in leh lo nei lote in sak ṭanpuina sum a sem.

In sak ṭanpuina hi Zuangtui community hall-ah sem a ni a; Zodintluanga chuan, in sakna tur chu Ministry of Housing and Urban Poverty Alleviation aṭanga hmuh a nih thu sawiin, "In sakna tur hi unit khat man Rs. 4,87,000 a ni a, a sak hna hi contractor hnenah pe loin, in neitute sak tura pek a ni a, an duh dana an sa thei tur hi an vannei hle a ni," a ti.

RAY pilot project hnuai­ah hian chhungkaw 20 velin Zuangtuiah in sak hna an ṭan tawh a, nimin khan chhungkaw 20 dang hnenah in sakna bul ṭanna tur Rs. 75,000 ṭheuh pek a ni.

Minister Zodintluang­a hian nimin vek khan Zuangtuia mi rethei in sak mekte a hmunah a enfiah bawk. Minister hi UD&PA secretary Vanlalramsanga leh officer dangte'n an ṭawiawm a ni.