Aizawla AR insawn chhuahna turin MHA-in ṭum 2 a rawn hriattir tawh: 'MoU kan nghak mek' - Chief Minister

Home minister K Sapdanga chuan, Aizawl khawpuia Assam Rifles battalion-te insuan chhuak turin Ministry of Home Affairs (MHA)-in ṭum hnih a hriattir tawh thu a sawi a; chief minister Lalduhoma chuan, AR insawnna turah memorandum of understanding (MoU) siam nghah mek a nih thu a sawi bawk.

Nimina Assembly session-ah MNF member Robert Romawia Royte zawhna chhangin Home Minister chuan, sorkar laipuia MHA-in AR-te chu insuan chhuak tura a hriattir tawh thu a sawi a, "MHA hian February 19, 2019-ah leh March 11, 2020-ahte hriattirna a tichhuak," a ti.

Zawh belhna kal zelah House leader Lalduhoma chuan, AR insawn chhuah dan turah AR leh Mizoram sorkarin a hran ve vein MoU an duan thu leh, MoU-te chu a inmil loh avangin sawiho a ngaih thu a sawi a; tuna an nghah chu MoU sawi tlân kha a nih thu leh, MoU-ah an tàn rei chuan AR insawn chhuah hun tur a tlai hret theih thu a sawi.

CM Lalduhoma chuan, MoU duan a awm thu sawiin, "AR MoU a awm a, kan sorkar hmasa MoU a awm bawk a. A hran ve vein an siam a, an dah ringawt mai a, i sawiho teh ang tih a awm lo reng reng. Keini hian sawiho a ngai a nih hi kan ti a, keima chairman-na hnuaiah an vaiin ka ko khawm a ni, sorkar official-te leh AR-te nen. Kan point of diffrence (MoU-a inang lo) kan sawiho a, ama'rawhchu kan solve (chingfel) mai thei lo a, thil tam tak chu kan inhrilhfiah," a ti.

A hnuah Home Minister-in AR-te chu an chhuah thuai a ngaih thu a hrilh tih sawiin Lalduhoma chuan, "MoU pending reng hi Home Minister chairman-na hnuaiah tripartite meeting nei ila, Mizoram sorkar leh AR-te nen, MHA in chair ang a, i sawiho ang u, point of difference hi kan la chhuak ang a, chu chu a rang thei ang berin solve tum tlang ila, kan ti a, harsa lutuk tur pawh a awm lo," a ti.

Chief Minister chuan, a hnuah Home Minister-in a biak thu sawiin, "Kar khat chhungin tihfel kan tum ang tih kha phone-in min rawn hrilh leh a ni. Mahse, AR-in an MoU an draft ṭha leh duh a, chu chu kan nghak an ti leh a, a tih theih ta rih loh a ni," a ti a; hman nía Union Home Minister nen an sawi dun lehnaah MHA aṭangin Joint Secretary leh IB senior officer pakhat a rawn tirh chhoh tur thu sawi mah se, tun thlengin a la rawn tirh loh thu a sawi.

Zawhna neitu Robert Romawia'n RTI Act tlawhchhana zawhna chhannaah, MNF sorkar laiin Mizoram sorkarin MoU a siam loh thua chhan a nih thu leh, AR-in MoU an siam erawh chu Mizoram sorkarin a comment thu tarlan a nih thu a sawi a; thil awmzia a zawtfiah.

Chief Minister chuan, Assembly House-a an sawi chu thu dik zawkah pawm tur a nih thu a sawi a, "Sorkar hmasa khan MoU a siam a ni, AR pawhin an siam a ni. Chumi pahnih chu a inmil loh avangin, thu inmil lo a awm avangin sawiho a ngai. Chu chu kan hmabak a ni," a ti a; MoU-a inmil lo sawiho chungchangah member-te ṭawiawmna a ngen.