Kolasib district-a NH kawngpui dinhmun thlithlaitu tur din rêl

Kolasib bawrhsap Robert C Lalhmangaiha hoin August 19, Thawhṭanni khan Vairengte leh Sairang inkar National Highway no. 306 & 06-ah Kolasib district bika kawng chhe lutuk vanga mipui harsatna tawh dan leh chak zawka kawngpui thawm ṭhat dan tur sawiho a ni a; kawng dinhmun en thlithlai leh thlir letna nei ṭhin turin working committee din an rêl.

Robert C Lalhmangaiha chuan, ruahtui tlak chhungin kumin October a hawlh pha tura ngaih a nih thu a sawi a, "Engtin nge hemi chhung hian mipui harsatna kan chhâwk zângkhai ang tih hi kan ngaih pawimawh hmasak tur a ni," a ti.

Kawnpui leh Bualpui khaw zirlaite'n kawng chhiat vanga sikul an tlai ṭhin chu pawi a tih thu sawiin Bawrhsap chuan, "Sikul ṭan hun dik taka ṭan a, an lêt leh lamah pawh an in ṭheuh a hun taka an thlen theih nan theihtawpa hmalak a ni ang," a ti. Lirthei neitu pawl hrang hrang hruaitute chu an thuchhuah siam leh hmalaknain mipui a nghawng dan tur ngaihtuaha an thutlukna siam tawhte ngaihtuah ṭha leh turin a ngen.

Ṭhutkhawmah hian DC office-a officer te, Kolasib SP leh police hotu dang te, NH kawng enkawltu NHIDCL hotu te, Kawnpui SDO(Civil), PWD hotu te, kawng siamtu contractor te, Kawnpui leh Bualpuia sikul naupang nu leh pa aiawh te, Kawnpui, Bualpui leh Thingdawl VC member-te leh lirthei neitu pawl hruaitute an tel. Kawng chhia chungchanga hmalak dan tur, a bikin RTP Seṭhawn leh Kawnpui/Bualpui quarry inkar kawng chhia vanga lirthei tâng rei thei lutuk tihziaawm dan turte an sawiho a ni.

Tarlan tawh angin, Kolasib District Truck Owner Association, Kolasib district MTA, Kolasib Sub-Hqrs MTDA leh Kawnpui Town Driver's Association-te chuan NH 54/306/06 kawngpui a chhiat em avangin naktuk, August 22 (Ningani) chawhhma dar 10 aṭangin Kolasib district-a NH kawngpuite lirtheia zawh lo turin mi tin an chah a ni.

Pawl palite hian NHIDCL leh leh an hnuaia contructor-te chu PWD Minister leh Assembly Deputy Speaker-te ngenna zahlo leh pawisa duh loah an puh a; kawng siamtu contructor-te chu Kolasib district aṭangin August 2024 ral hma ngeia inla chhuak turin an phût a, an aiawh contructor hna thawk thei ngei tur dah turin Mizoram sorkar an ngen bawk.

ṬHUTKHAWMA AN RELTE

* Kawng khuar zual lai hun tiam chhunga hnawh.

* Zirlaite'n a hun taka sikul an thlen theih nan zing lam sikul kal hun leh tlai bân hun chhungin lirthei lian tlan phal loh hun siam.

* Felfai taka lirthei a tlân theih nan Seṭhawn leh Kawnpui/Bualpui quarry inkarah zan lamah traffic duty dah.

* Chhun lamah NHIDCL contractor mi rawihte'n an vil ang.