Ramri bâwrah Assam-in hma an la tih Mizoram sorkarin a hria - Home Minister
Home minister K Sapdanga chuan, Mizo-ram leh Assam ramri bawr, state pahnihin an ram china an chhàl ve veah Assam lamin hma an la tih Mizoram sorkarin a hriat thu nimin khan Assembly House a hrilh.
Hachhek bialtu MNF member Lalrintluanga Sailo-in Mizoram-Assam ramri bul, Mizoram lamah Assam-in kawng an siam tih sorkarin a hriat leh hriat loh a zawhna chhángin Home Minister chuan, "State pahnihte'n ramria kan pawm chin a inang lo a, ram neitu zawk nia kan inchhàl ve vena hmunah Assam sorkarin Assam police camp panna tur kawngah hma an la tih hriat a ni," a ti.
Assam-in hma an lakna hmun chu Kolasib district thuneitute'n a hmunah an endik nghal tih sawiin K Sapdanga chuan, "Kawng sial sa an siam tih hmuh a ni a, a hna leh an hmalaknate chawlhtir nghal tura hriattir an ni," a ti a; Kolasib DC-in July 31, 2024 khan Cachar leh Hailakandi DC-te hnenah lehkha thawnin, status quo bawhchhe lo tur leh an hmalaknate titawp nghal tura a hriattir thu a sawi.
Zawh belhnate a chhannaah Home Minister chuan, Mizoram leh Assam ten ramri an tih chin a inang lo a, harsatnate a thlen tawh thu sawiin, "Ram zau tak kan la tawh a, sorkar hmasate hmalakna a fakawm tak zet," a ti.
Home Minister chuan Vairengte Aitlang leh Saihapui-V a tlawh tawh em tih zawhna chu, "January 16, 2024 khan ramri vela police outpost hrang hrang ka tlawh kual. Saihapui-V leh Aitlang thleng ka tlawh kual a, outpost 11 ka tlawh," a ti. ZPM sorkar chhungin ramri buai chinfel hrâm an tum thu a sawi bawk.