Bru chungchangah CM beihnain Rah ṭha a chhuah - MNF Vice President

MNF vice president Lal­thlengliana chuan, Mizoram aṭanga Tripura-a chhuk Bru-te Tripura-a an awm hlenna tura inremna ziah a ni ta chu lawm­awm a tih thu sawiin, chief minis­ter Zoramthanga'n nasa taka a beihnain rah ṭha a chhuah a, a hlawhtling ta niin a sawi.

Lalthlengliana hian nimina Mizo Hnam Rûna inkhawmah thu sawiin, "MNF president leh CM ni bawk Pu Zoramthanga’n 'Tuikukte hi India rama awm an ni a, Mizoram chauh an awmna a ni bik hleinem, Tripura-ah pawh awm nghet ang hmiang' tia a nawrna leh nasa taka a beihnain rah ṭha a chhuah a, YMA leh NGO hrang hrangin nasa takin hma an la bawk a, an hmalakna chuan rah ṭha a chhuah ta hi a lawmawm tak zet a ni," a ti.

CAB chungchangah Lal­thlengliana chuan, Mizoram CM leh MP-te'n CAB-in Mizoram a huam lohna tura theihtawp chhuaha an beihna a hlawhtling tih sawiin, "MNF hian kawng hrang hrangin beihna a tâwk nasa hle. Aizawl an bomb lai ngei hmutu leh tuartute ngei tam tak an la dam lai ngei pawhin ‘Aizawl an bomb lo’ tiin an sawi ngam a, 'MNF-in zalenna an sual lo' te pawh an ti fo," a ti a; India dona tura China-a kea kalte'n MNF-in zalenna a sualzia a sawifiah hlea a hriat thu a sawi.

MNF Vice President chuan, MNF kaihhruai sorkar chu zu zuar ve tur anga puh a nia sawiin, MNF sorkarah zu zawrh a nih dawn loh thu a sawi a, "Heng thusawitute zingah hian ZPM hotu, talk show neihna leh mahni lehkhabu ziah meuhah pawh zu zawrh sawi mawi ṭhintute an tel. Sorkar hmasa zu zawrh laia zu dah khawlna hmunpui neitute pawh a phusaah an ṭang," a ti.

Lalthlengliana chuan, Mizoram mipui an harh a hun tawh nia sawiin, "Congress sorkar kan hre chiang tawh a, tuna inzuar mek ZPM-te pawh kan hriat chian a pawimawh. ‘Kan unit chu kohhran’ titute hi i ring lo ngam ang u," a ti a; ZPM ring lo turin mipui a chah a ni.