Chhungkaw 6,586-te sawhthing a tám; House-ah thlai man chungchang sawifiah

Horticulture minister Prof. Lalnilawma chuan, kuminah Mizoramah sawhthing chingtu chhung­kua 25,102 an awm thu leh chung zinga chhungkaw 6,586-te sawhthing a tàm thu nimin khan Assembly House a hrilh. House-ah hian thlai man chungchang sawifiah a ni.

ZPM member H Ginzalala zawhna kal zela zawh belhna a chhannaah Horticulture Minister chuan, an department chhinchhiah dan chuan Mizoramah sawhthing chíngtu chhungkua 25,102 an awm thu leh chu'ng zinga chhungkaw 6,586-te sawhthing a tàm thu a sawi a, "Kan bawhzui mek a, Operation Ginger tiin hmun hrang hrangah kan insem darh a, hma kan la mek," a ti.

Prof. Lalnilawma chuan, sorkarin thlai a thlan bik palite hralhna turin society din a nih tawh thu sawiin, "Hma kan la a, tunah hian khaw tinah multipurpose farming cooperative society kan indin tawhah kan ngai," a ti a; thlai lei tur chungchang chu research base-a an kalpui thu leh, a leitu turte an zawn mek thu a sawi.

Horticulture Minister chuan, sorkarin a leisak vek dawn em, tih chu an tum dan a nih thu a sawi rualin, "Sorkarin a lei kan tih khan sorkarin cash-in a va leisak dawn a ni lo a, sorkar kha facilitator-ah kan ṭang dawn a ni. Sorkarin direct-in a leisak dawn lo, kut hnathawktute leh a leitu turte inkarah sorkarin a facilitate dawn a ni," a ti.

Sorkar ruahman dan chuan sawhthing chu Rs 50 aia hniam loa lei tur a nih thu te, hmunphiah chu kg. khatah grade-A Rs 100 leh grade-B Rs 80 aia tlawm loa lei tur a nih thu te, thlai dangte man pawh sorkarin a bithliah tawh thute Lalnilawma chuan a sawi bawk.

Thlai man chungchangah hian Agriculture & Farmer Welfare changtu minister PC Vanlalruata chuan, "Sorkar kal tawh rêng rêngin a market an lo buaipui ngai lo a, sorkar tharah hian market buaipui kan ṭan nghal a, market buaipuitu committee-te kan din," a ti a; thlai man (rate) tihchhuah (notify) tawh a nih thu sawiin, "Sorkarin rate a bithliah aia tlawma hralh a nih dawn chuan sorkarin hma a la dawn a, support price-te pein, a leitu turte kan ruat fel deuh nual tawh," a ti.