Naupang pawi khawihtu laka rilru puthmangah mipui náwlpui insiamṭhat a la ngai - MSCPCR

Mizoram State Commi­ssion for Protection of Child Rights (MSCPCR) hotute chuan nimin khan Aizawl Press Club-ah thuthar thehdarhtute an kâwm a; naupang pawi khawihtute laka rilru puthmangah Mizoram mipui náwlpuiin insiam­ṭhat an la ngaih nasat thu an sawi.

MSCPCR chairman Jimmy Laltlanmawia chuan, Mizoram mipui náwl­puiin naupang en­kawl danah nasa taka hma an sawn thu a sawi a, "Nau­pang pawi khawih­tute laka mipui náwlpui rilru puthmang erawh siam­­ṭhat a la ngai nasa. Nau­pangte hum­halhna dan ṭha tak tak kan neihte hi naupang tihluhlângtu leh tipâwngpawrhtu ang deuh­a ngai kan la awm hi a dik lo," a ti.

Jimmy Laltlanmawia chuan, "Naupang kum 18 la tling lote hian pawi an khawih a nih pawhin hrem tur an ni lo a, siamṭhat tum tur an ni tih hi khawvelin a pawm dan leh tuna kan dan hman laiin a tum ber a ni," a ti a; naupang enkawl danah kawng tinrenga hmasawn a, an nun khawchhuah theih­­na tur remchang siam­sak te, an dikna leh chan­vo humhalh te, an duh zawng leh vei zawng an sawi chhuah theih­na tura rem­chang siam­sakte a ṭul thu a sawi.

MSCPCR Chairman chuan, naupangin sikul luhna leh thil danga harsatna a neih chuan RTE helpline no. 6009888804 a awm thu a sawi a; naupang harsatna neite chungchangah inthlahrung loa helpline-ah thlen zel turin mipui a chah.

Naupang chunga dan loa thil tih leh an dikna leh chanvo rahbehna a awm chuan report/FIR a awm kher loh pawhin MSCPCR-in suo moto case siamin hma a la thei tih Jimmy Laltlanmawia chuan a sawi bawk.

MSCPCR hotute tarlan danin, India hi United Nations Convention on the Rights of the Child (UNCRC) pawmtu a ni a, chumi anga hmalakna zingah The Commission for Protection of Child Rights Act, 2005 siam a ni. He danin a phût angin National Commission for Protection of Child Rights din a ni a, state hrang hrangah state commission din niin, Mizoramah pawh kum 2018 khan MSCPCR din a ni.

MSCPCR-ah hian chairman bakah member pathum - R Lalṭanpuia, Darṭhakunga leh Vanhmingliani te an awm a; secretary chu Lalengvari a ni a, thawktu dang mi 18 an awm mek bawk.

MSCPCR MAWHPHURHNA LEH THUNEIHNA

■ Sorkarin dan, policy leh programme a siamte bakah, sorkar inrelbawlna kalphung reng reng naupangte dikna leh chanvo humhalhna nen a inmil leh inmil loh vil.

■ Naupangte dikna leh chanvo humhalhna dante a ṭha tawk em tih zir chian a, a ṭul anga sorkar finchhuah leh rawtna thlen.

■ Naupangte dikna leh chanvo bawhchhiatna a thlena an thlavang hauh.

■ Naupang ṭanpui ngai apiang ṭanpui.

■ Commission hi civil court thuneihna pek a ni a, commission hmaa inlan turin mi tu pawh a ko thei. Thuhretute thusawi lak khawm, record leh document eng pawh lâk chhuah theihna a nei a, thubuai eng pawh magistrate hnenah a hlan chhâwng thei bawk.