Borapansury-a thil thleng vangin MZP-in Chakma-te chhuak lo turin an chah

August 19, Thawhṭanni tlai khan Borapansury-ah Chakma hmeichhiate'n Borapansury-a police pahnih kut an thlâk rawn. He thil thleng avang hian MZP Gen.Hqrs chuan pawi khawihtute thubuai siamsak an nih hma chuan Chakma-te páwnchhuak lo turin an chah.

Thu dawn danin, August 19, 2024 tlai khan Borapansury officer in-charge (OC) Sub-Inpector Clifford-a leh constable Zothansanga te chu Chakma hmeichhia tam takin kut an thlâk rawn a ni. Clifford hi a lu, a kut leh a khûpah a hliam a, Zothan­sanga chu a bekah thing­fâka vuak a nih avangin a bengin rî a hre lo. Hliam ve ve mah se, ngaih­tuahawm an ni lo thung.

Borapansury-a thil thleng chungchang hi MZP Gen.Hqrs chuan nimin khan an pisaah an ngaihtuah nghal a; thu­chhuah siamin, "Mizoram chhung ngeiah Mizoram police-te an him lo leh kut an tuar ta mai hi hriatthiam har kan ti a, kan dem tak zet a ni," an ti.

MZP chuan, Borapan-sury-a Mizo police kut thlak­tute zawng chhuaka thu­buai siamsak turin sorkar an ngen a; pawi khawihtute thubuai siamsak an nih hma chuan Chakma-te chu an sa him nan páwn lama chhuak lo turin an hriattir a ni.