Khualbûk inelna tur inhrilhfiah

Kolasib leh Serchhip district bawrhsapte chuan nimin khan an district tan khualzinte thlenna khualbûk hrang hrangte inelna tur inhrilhfiahna leh zirhona, Swachata Green Leaf Ratings Orientation Training/Workshop an hawng.

Swachhata Green Leaf Rating hi sorkar laipuia Department of Drinking Water and Sanitation leh Ministry of Tourism-in Travel for Life Campaign hnuaia hma an lakna a ni a; khualzinte chawlh hahdamna/thlenna hmun - hotel, resort, homestay leh khualzinte'n thlenna hmun atana an hman zawng zawng, sorkar leh mimal enkawlte'n faina lama kaihhruaina duante an zawm ṭhat leh ṭhat loh tehna tur a ni.

Kolasib DC Robert C Lalhmangaiha chuan, Kolasib chu ram pawn lam mi khualzin tamna ber pawl a nih thu sawiin, "Mizoram kawtchhuah kan nih angin Mizoram hmêl lanna hmasa kan nihna chen a awm," a ti. Khualbuk neitute chu an pawimawhna hria a, an hmunhmate thianghlim leh fai taka vawng turin a chah a; Swachata Green Leaf Ratings verification team-te'n an hmunhmate enfiaha rating an pek dawn thu a sawi.

Serchhip DC Paul L Khuma chuan, Serchhip district chu district fai, hmun dangte tan pawha entawn tlak a nih theihna turin mi tinin faina ngai pawimawh a, 'Clean Serchhip' tih rilru pu reng turin a sáwm. Homestay, hotel, lodge leh rest house-te vawn fai a ṭul thu te, zin veivakte'n riah an chakna leh tlawh nawn leh an châkna hmuna siam theitu chu a enkawltute leh mipui an nih thu a sawi bawk.