HIV/AIDS & STI campaign dan tur rêl

Saitual district bawrhsap Dr Lalngura Tlau hoin nimin khan DC conference hall-ah sorkar hotu te, kohhran, khawtlang leh tlawmngai pawl aiawhte'n HIV/AIDS leh sexually transmitted infection (STI) campaign rally neih dan tur an ngaihtuah.

Ṭhutkhawma tarlan danin, Saitual district-a middle school, high school, higher secondary school, college leh technical institution-a zirlaite tan placard insiamsiak, extempore speech, stall insiamsiak leh flash mob dance-ahte an inelna buatsaih a ni dawn.

HIV/AIDS lama thawkte chu anmahni khaw huam chhung ṭheuha zirlaite hnenah HIV/AIDS leh STI chungchang zirtir tura tih an ni a, khaw hrang hranga maxicab/taxi/auto-rickshaw-ahte HIV/AIDS leh STI chungchang zirtirna sticker bel tur a ni bawk a; hmanruate hi MSACS-in an tum ang.

National AIDS Control Organization chuan India ram state tina district zawng zawng leh thingtlang kilkhawr thlenga HIV/AIDS chungchang zirtirna beihpui, Intensive IEC Campaign - India Fight Against HIV/AIDS and STI’s kalpui turin district tina District AIDS Prevention & Control Committee hriattir a; chumi ang chuan Saitualah pawh HIV/AIDS rally leh intihsiaknate buatsaih tum a ni.