Japan-a hna thawk tura thlante vailiam

Social Welfare & Tribal Affairs, Women & Child Development minister Lalrinpuii chuan August 19, Thawhṭanni tlai khan a pisaah RIPANS hnuaia kum upate enkawl hna (geriatric caregiver) zir chhuak leh Japan-a kal tura thlan mi pariat a vailiam.

Geriatric Caregivers Training hi Ministry of Social Justice & Empowerment hnuaiah Atal Vayo Abhyuday Yojana (AVYAY) scheme hmanga kalpui a ni a; Social Welfare and Tribal Affairs department chu nodal agency niin, RIPANS chu training centre a ni.

Mi pariatte chu National Skill Development Corporation (NSDC) hmalaknaa kal tur an ni a, screening an paltlang hnuah Japan lama anmahni ruaitu tur (client/employer)-te interview an hmachhawn ang a, Delhi-ah Japan ṭawng thla 9 chhung an zir ang. Chumi hnuah Japan ramah hna thawk turin an kal dawn a ni.

RIPANS-ah hian geriatric caregivers training first batch-in an zir zo tawh a, Mizoram Geriartric Caregivers Association an din tawh. August 12, 2024 khan batch hnihnate'n zirna an ṭan leh tawh bawk.

Minister Lalrinpuii chuan, damdawi lama thiamna sang zelah mihring dam chhung a rei chho zel tih a sawi a, "Kum lama upate chu bawrhsâwmnain a tlâkbuak sam bik a, hei hi hriain Ministry of Social Justice & Empowerment chuan scheme thar, Creation of pool of trained geriatric caregivers programme a duang a ni," a ti a; ṭhalaite chu nu leh pa, pi leh pute duat leh hmangaih taka enkawl turin a chah.