Thil man tisang lo turin hriattir

Mizoram Merchant Association (MIMA) chuan thuchhuah siamin, Kolasib district-a lirthei pawl hrang hrangin August 22, 2024 aṭanga Kolasib district chhunga NH kawngpuia lirthei tlan lo tura an ngenna chu an thlàwp thu an tarlang a; thil man tisang lo turin sumdawngte an chah.

MIMA chuan, August 22, 2024 aṭanga tiam chin awm loa Kolasib district-a lirthei tlân lo tura inhriattirna chuan mipui a nghawng hle tura an ngaih thu an tarlang a, "Kolasib district motor neitute hmalak tumna hi a ṭhain, kawng siamṭha tur hian hmalak thuai ni se kan duh. Sorkar hian rang taka ngaihtuahin hma la thuai se kan duh a, kan ngen a ni," an ti.

Kolasib district-a lirthei pawlte hmalakna chuan mipui a nghawng thei tih sawiin MIMA chuan, "Sumdawng tu mahin kan thil zawrhte chheprelh lo tur leh tito lo turin kan ngenin kan hriattir a ni," an ti a; bungrua tito leh chheprelh an hriat chuan an lakah MIMA-in hma an lak dawn thu an tarlang.