Iron rod bûk zel turin hriattir

Lunglei district additional DC James Miahlung chuan thupek chhuahin, Lunglei district-a iron rod zuartute chu bûkna dik hmanga iron rod an hralh turte bûk vek turin a hriattir a; thupek zâwm lote chu Legal Metrology Act, 2009 leh Mizoram Legal Metrology (Enforcement) Rules, 2010 hnuaiah hrem an nih tur thu a tarlang.

Lunglei Additional DC chuan, tun hnaia Lungleia iron rod zawrhna dawrte endikna aṭangin iron rod zuartu zingah bûk loa iron rod hralh an awm tih hriat a nih thu leh, chu chu dan bawhchhiatna leh consumer-te dikna chanvo rahbehna a nih thu a tarlang a, "Legal Metrology Act, 2009 Section 34 leh Mizoram Legal Metrology (Enforcement) Rules, 2010 Rule 10-in a sawi angin iron rod zuar zawng zawngte'n an hralh chhuah hmain bûkna dik tak hmangin an bûk hmasa ngei tur a ni," a ti.