KHAWTHLIR
Dental surgeon lem police-in man
Lehkha lem hmanga ha doctor (dental surgeon) anga hna thawk ṭhin Christina Lalṭhazuali, Dinthar, Aizawl chu August 18, 2024 khan police-in an man a, Central Jail-ah dah nghal a ni. Christina Lalṭhazuali lakah hian July 18, 2024-ah Aizawl SP-ah FIR thawn a ni a, July 24-ah police-in an dawng. A lakah FIR thehluh a nih avangin Christina-i hian Gauhati High Court Aizawl Bench-ah anticipatory bail a dil a, mahse, Court-in a hnâwl. A hnuah damdawi-inah enkawl a ni a, damdawi-in aṭanga a chhuah hnuah August 18 khan man a ni a, Court thu angin August 18 vêk khan Central Jail-ah dah luh a ni.
Thisen pe
Aizawl North College NSS chuan nimin khan an college-ah blood donation camp an huaihawt a; Civil Hospital, Aizawl tan thisen unit 49 an pe a, petute mipa 31 leh hmeichhia 18 an ni.
Sikul chawlh
Aizawl DC Lalhriatpuia, District Disaster Management Authority chairman ni bawk chuan nimin khan zing aṭanga ruah a sur avangin zirlai naupangte him zawk nan nimin August 20 kha Aizawl district-ah sikul chawlh a puang. Vawiin August 21-a sikul chawlh leh chawlh loh turah Aizawl DDMA chuan vawiin zing dar 6:30 thleng khaw awm dan an ngaichâng dawn nia thu dawn a ni. Serchhip DC chuan vawiin hi an district-a sikul chawlhah a puang tawh a ni.
AVPA training
IPR directorate chuan nimin khan Information & Communication Technologies training hall-ah district hrang hranga IPR office-a technical staff 24-te tan 'Technical Skill Upgradation Training for AVPA' a buatsaih a, IPR joint director F Lalfakzuala'n a hawng. Training hi ni li awh tur a ni a, hawnna hi IPR deputy director Andrew H Lalremruata'n a kaihruai. DSLR, gimbal leh drone hman dante leh thil dangte an inzirtir a ni.
Campaign khâr
ZPM chuan nimin khan AMC Ward-VI by-election neih tura campaign khârna inkhawm Hunthar Veng MHIP Hall-ah an buatsaih a, ZPM hruaitute'n thu an sawi. Thu sawitute chuan by-election-ah vote thlak vek turin Ward-VI huam chhunga vote neite an chah a; ZPM candidate H Lalremtluanga vote turin an sáwm bawk.