Khawlailungah Kurtai Kût an hmang

Khawlailung Sugar­­cane Growers’ Association (KSGA) chuan, nimin khan Khawlailung bazar kâwnah Kurtai Kût an hmang a, Agriculture minis­ter R Lalzirliana Kût Pa a ni.

Agriculture Minister chuan, fu chíngtute dâwm kanna turin ruahmanna siam a ni tih sawiin, "Kum­in aṭangin RKVY hnuaiah ruahmanna thar ṭha tak tak siam a ni. Fu chìn dan thar enchhinna siam niin, he programme hmang hian fu mit pakhat chauh nei leh mit 2/3 nei kár thlaka chìn a ni dawn a, hectare khat zelah Rs. 8,000 ṭanpuina pek a ni ang ," a ti.

R Lalzirliana hian Khawlailunga road side market sakna tur atan work order leh kût lawmpuina atan Rs. 20,000 a hlan.

Bialtu MLA Van­lalawmpuii Chawngthu chuan fu chingtute'n an thawhrimna rah an seng chu lawmawm a tih thu a sawi bawk.

Khawlailungah hian in 515 awmin, an zinga chhungkaw 150 chuangin fu an chíng a, kum 2014 khan kurtai quintal 2,250 vel an thar a, Rs. 1,12,50,000 man vel an hralh niin an insawi.