KHAWTHLIR
Free clinic
All Mizoram Women Federation, MHIP Falkawn Branch leh State Referral Hospital-te chuan nimin khan State Referral Hospital-ah a thlawna inentirna leh natna inkaichhawn theih loh chi (non-communicable disease) chungchang zirna an buatsaih a; mi ṭhahnem tak an inentir.
Pass lawmpui
Social Welfare department chuan nimin khan Observation Home, Durtlang North-ah kum 2013-2014 chhunga Observation Home-a naupangte zinga HSLC pass lawmpuina hun leh Pathian hnena lawmthu sawina an hmang a, AMC-a bialtu councillor Lalrinenga Sailo-in a hmanpui. Observation Home aṭang hian kum 2013-14 khan naupang pangain open school-ah matric an exam a, pathum an pass a ni.
L Biakliana Ruhro phawrh
Mizo thawnthu (novel) ziak hmasa ber L Biakliana (1918-1941) ruhro chu March 9, 2015 khan Shillong-a an phûmna, Robert Hospital Cemetery aṭangin Saitual Centenary Celebration Committee leh Shillong MSU-te'n an phawrh a, vawiinah Aizawl an rawn thlenpui beisei a ni.
Tihpun duh
Mizoram State Level Co-ordination Committee for Persons with Disability, nimina Secretariat conference hall-a ṭhukhawm chuan Mizoram sorkarin rualbanlote tana unemployment allowance, pension leh student stipend a pek ṭhinte tihpung tura sorkara thlen an rel.
Mi 1,195 admit
February, 2015 chhung khan Aizawl Civil Hospital-ah inentir mi 27,768 an awm a, heng zinga mi 1,195 chu admit an ni. Naupiang 386, mitthi 66 leh Mizoram pâwna kal tura tih mi 162 an awm bawk.