Minister-te'n Saron indoor stadium tur an en

Minister Lalsawta leh Sports minister Zodintluanga-te chuan, nimin zing khan Saron Veng indoor stadium thar sak dan tur a hmunah an en. Indoor stadium hi cheng nuai 500 sênga sak tur a ni.

Bialtu MLA, minister Lalsawta chuan, thil sawi an thiam vak lo a, hna an thawk tawp mai nia sawiin, "Sport-ah phei chuan minister-in ropui takin a thawk a, mahse kan sawiin kan fak vak thiam lo," a ti a; Saron Veng mipuite chu hall satute enpuia ṭha taka ṭawiawm turin a chah.

Sports minister Zodintluanga chuan, Saron veng indoor stadium chu bialtu MLA ṭhahnemngaihna leh beih nasat vangin a hlawhtling dawn ta nia sawiin, Saron Veng mipuite a lawmpui thu a sawi. Dawrpui Multipurpose Centre din turah mi pakhat Court-a a kal vanga hna thawh ṭan theih a ni lo chu pawi an tih thu a sawi bawk.

Sports Minister sawi danin, Saron Veng indoor stadium hi tuna a awmna ngaiah sak tur a ni a, Special Plan Assistance aṭanga sum hmuh cheng nuai 500 hmanga sak tur a ni. Chhawng li a ni ang a, car parking, boxing ring or TT hall, conference hall leh badminton court-te a awm dawn a ni.

Zodintluanga hian nimin zing vêk khan Ramhlun Sports Complex khelmual chhaka Boxing Training Centre tur sak mek a enfiah bawk a; building sak nan cheng nuai 150 ruahman a nih thu sawiin, boxing ring pahnih dah a ni ang a, hostel a awm nghal tur thu a sawi.