Museum Week hman ṭan a ni A thlawnin museum a tlawh theih

Mizoram State Museum chuan nimin khan Museum Week 2020 an hmang ṭan a ni. Week hi January 24, Zirtawpni thleng hman tur niin, Week chhungin Mizoram Museum chu ni tin chawhma dar 10 aṭanga tlai dar 3:30 inkarah en man awm loin an hawng dawn a, en turin mi zawng zawng an sáwm.

Museum Week hawnna inkhawm hi nimin khan Mizoram State Museum-ah neih a ni a, Art & Culture director R Hmingthanzuala khuallian a ni. Khuallian chuan, Mizo hnam hrang hrangte inunauna vawng thar leh turin museum hlut leh zual a ṭul thu a sawi a, "Mizote'n kan ram leh hnam hmasawnna tura ke kan pen lai hian, kan nihna min hriat chiantirtu museum hi i ngaihlu zel ang u," a ti.

Mizoram State Museum hian kum 2018-19 sorkar kum chhung khan tlawhtu mi 13,157 a nei a, tlawhtu zinga mi 33 chu ram dang mi an ni. Museum en man aṭangin Rs. 41,430 an hmu.State Museum-ah hian gallery paruk a awm a, museum object 2,679 an la khawm tawh a, object 729 chu show case hrang hrang 109-ah pho chhuah niin, a bâk zawng hi reserve collection-ah dah a ni.