District committee kaltlang loa PMJVK hnuaia hna inpek leh thawh a tam - CM

Chief minister Lalduhoma, House leader ni bawk chuan, hun hmasa lamah district committee kaltlang loa PMJVK hnuaia hna inpek leh thawh a tam thu sawiin, PMJVK project lo kal leh turte chu dik taka tih an duh thu a sawi.

Nimina Assembly session-ah PMJVK hnuaia hnathawh chungchang zawhna kal zelah CM Lalduhoma chuan, PMJVK guideline-ah chuan 80% chu hriselna lam (health) leh zirna lam (education)-a hman tura tih a nih thu a sawi a, "Chutihlai chuan 100%-te sports-ah a kal a ni. Chu chu pa leh fapain thlarau thianghlim tel loin an enkawl a, kan hre vek a ni. Chutiang chu thleng tawh lo se kan duh. District committee kaltlang lo a tam em em," a ti.

House Leader chuan, PMJVK hnuaia hna inpek tawh dan sawiin, "Minister zinin hei hi lo thawk rawh tia verbal-a work order a pek, bill lo kal kan pek leh hi a tam lutuk. Finance department kan lu a tihai," a ti a; work order awm lo, verbal-a thawk tura an intih, hna an thawh tawh, bill an theh­luhte chu an thawh miau si avangin bill an tihfel (clear) hram hram ṭhin thu a sawi.

Work order awm lo leh ṭawngkaa thawk tura intih ang chi chu PMJVK hnuaiah pakhat tal a awm chuan hrilh tura Hachhek bialtu MNF member Robert Romawia Royte-in a zawh chungchangah Chief Minister chuan, an hrilh theih thu leh a list an buatsaih tur thuin a chhang a ni.

Robert Romawia Royte chuan, Sports leh ICT dept.-ah PMJVK hnuaiah nuai 40,000 chuang hmuh a nih thu leh DC-te pawmpuia tih vek a nih thu a sawi a; DCMA minister a nih hma chuan department tam takin sum an hmu thei lo tih sawiin, "Nuai 2,00,000 chuang SLC recommend thlapa project thehluh tawhah hian nuai 40,000 chuang chauh hi Mizoram sorkarin kan hmu," a ti.

PMJVK hnuaia project sum an la dawn loh chhan chu sorkar hmasa lama hna inpek, la zawh loh tam lutuk vang a nih thu sawiin Lalduhoma chuan, "Pending la ni si, hna chhe si, tunah hian State Project Monitoring Committee-in an vil reng a, an endik mek a ni. Chu chuan a lo kal leh tur min tibuai a, UC-te a hunah a pek theih loh. Tunah hian a lo kal leh tur hi chu dik taka tih kan duh," a ti a; mahse, tunah chuan lo kal leh tur a la awm hlei thei lo tih a sawi.

DCMA leh NECS-in Deed of Agreement an siam chungchangah Robert Romawia chuan, "Project submit ṭhin sum hmu ve lote khan eng emaw rawtnate an nei a ni mahna, DCMA leh NECS khan agreement kha an sign a, Law leh Finance te pawhin an vet thlapin," a ti a; DCMA Minister a nih leh tak avangin a fapate firm leh DMCA-in Deed of Agreement an neih a rem loa a hriat avanga withdraw leh a nih thu a sawi.