January-July 2024 chhungin Lengpui Airport aṭangin Rs 4,38,98,500 hmu

General Administration department enkawltu chief minister Lalduhoma chuan, January-July 2024 chhungin Lengpui Airport aṭangin Rs 4,38,98,500 hmuh a nih thu Assembly House a hrilh.

House leader Lalduhoma hian nimin khan MNF member H Lalzirliana zawhna ziaka chhângin, kumin January-July chhunga Lengpui Airport aṭanga sum hmuh zat chu Rs 4,38,98,500 a nih thu a tarlang a; mi dang hnena Lengpui Airport hlan leh hlan loh chungchang zir chiangtu tur committee din a ni a, committee chuan an report-te July 31, 2024 khan Chief Minister hnenah an thehluh thu a tarlang bawk.

Airport Aurthority of India emaw, mi dang emaw hnena Lengpui Airport hlan tumna a awm leh awm loh zawhna chu chhan chian a ni lo a; "Lengpui Airport hi AAI emaw, third party emaw hnena hlan/tihral tum chungchangah hian zir chiang tur Working Committee to Look into the m,aintenance and Management of Lengpui Airport' dt. 1.2.2024 khan din a ni a, Committee hian report hi Chief Minister hnenah 31.7.2024 khan thehluh a ni," tia chhan a ni.