Chhiatnaa thite ràlna pe kim tawh

Disaster Management & Rehabilitation minister K Sapdanga chuan, Cyclone Remal-in May 28, 2024-a chhiatna a thlena thite chu sorkar aṭanga ràlna pek vek tawh a nih thu nimin khan Assembly House a hrilh.

DMR Minister hian MNF member H Lalzirliana zawhna ziaka chhángin, "Cyclone Remal ruahsur vanga tun hnaia chhiatna tâwk, nunna chânte sorkarin râlna (ex-gratia) a pe kim tawh," a ti a; June 11, 2024 zana ruahsur nasa vanga Khantlang khuaa leiminin in a hnâwlnaa thi mi pathum - Sanjiv Chakma, Kripa Mala Chakma leh Samolokki Chakma te pawh sorkarin râlna a pek kim tawh thu a tarlang.

DMR Minister tarlan danin, Cyclone Remal vanga chhiatna thlenga thi sorkarin a râlte chu mi 34 an ni a, mi pakhat tan Rs 4,00,000 ṭheuh pek niin, mi 34 tan Rs 1,36,00,000 pek a ni.