MLA leh MP-te TB chungchang zirtir

Health & Family Welfare department chuan nimin chhun khan Assembly session chawlh­lâwk laiin Assembly Annexe conference hall-ah MLA leh MP-te tan ngawr (TB) chung­chang inzirtirna an buatsaih. MLA parukin Nikshay Mitra (TB supporter) ni turin hming an pe thar.

Assembly speaker Lalbiak­zama chuan, Mizoramah TB vei an la tam thu sawiin, TB enkawlna a thlawna sorkarin a ruahmante chu mipuiin an hriat a, an chhawr ṭangkai zual theih nan ram hruaitute'n mawhphurhna an neih thu a sawi a; TB damlo tana chhawmdawlna programme-ah hming pe lut a, Nikshay Mitra (supporter) ni vek turin MLA leh MP-te a sáwm.

Inlawmna thu sawitu HFW secre­tary Sangchhin Chinzah chuan, TB-in mi tam tak nunna a la suat reng thu leh chhungkaw tam tak retheihna a thlen thu leh India ramah kum 2025-ah TB ûm bo tum a nih thu a sawi a; TB ven­naa mipui fuihtu leh zirtirtu ni turin MP leh MLA-te a ngen.

Zirhona hi Health Services director Dr Lalremmawii'n a kaihhruai a; National Health Mission mission director Dr Eric Zomawia'n TB programme kalphung te, TB natna chung­chang leh sorkar hma­laknate a sawifiah.

NHM Mission Director tarlan danin, January-June 2024 chhungin mi 10,063 endik zingah TB vei mi 1,209 hmuh chhuah a ni a, MDR-TB vei mi 39 leh, TB leh HIV vei kawp mi 118 hmuh chhuah a ni bawk. TB vei zinga 80% enkawl dam an ni a; kumin thla ruk chhungin TB vangin mi 56 an thi thung.

MLA zingah Nikshay Mitra ni a, TB damlote chhawmdawlna pe tura hming pe thar mi pariat an awm a, a hma aṭanga Nikshay Mitra ni tawh MLA dang paruk an lo awm tawh bawk. Nikshay Mitra-te chuan TB veite'n chaw ṭha an ei theih nan mi pakhat tan thla khatah Rs 700 an pe ṭhin a, TB vei enkawl hun chhung chu a rei lo berah thla 6 a nih avangin thla 6 atan Rs 4,200 a ngai a; kum 3 thleng pek theih a ni. Mizoramah Nikshay Mitra mi 82 an awm mek.